Autoridade Covalima husu komunidade uza subsídiu $200 ba nesesidade família
COVALIMA, 14 dezembru 2022 (TATOLI)–Administradór munisípiu Covalima, Francisco de Andrade, husu ba komunidade Covalima ne’ebé simu subsídiu fim do ano $200 ba uma kain atu uza ba nesesidade família.
Notísia Relevante: Governu halo pagamentu subsídiu $200 ba uma kain 6.572 iha Suai
“Durante halo pagamentu subsídiu fim do ano $200 ba uma kain iha Covalima, ha’u halo minitorizasaun no hateten ba komunidade katak se simu ona osan utiliza osan ne’e ho didi’ak hodi uza ba nesesidade família, labele uza osan ne’e lori hemu tua no joga karta ne’e,” Francisco de Andrade hato’o ba Agência Tatoli, iha nia kna’ar fatin Sukear Laran, kuarta ne’e.
Durante tékniku no ekipa pagamentu halo pagamentu subsídiu fim do ano $200 iha Covalima, nia mós halo monitorizasaun iha suku sira hanesan iha suku Suai Loro, Matai, Debos, Suai Loro, Labarai, Camanasa no Ogues.
Hosi monitorizasaun ne’e, autoridade ne’e mós fó hanoin ba komunidade iha direitu atu simu osan maibé uza osan ne’e tenke tuir dalan, hodi uza ba nesesidade família nian no komunidade mós aprezenta problema hanesan naran laiha lista pagamentu.
“Ha’u halo monitorizasaun ne’e, komunidade aprezenta problema hanesan komunidade nia naran laiha nune’e ha’u esplika ba sira katak sei iha lista adisionál tanba pagamentu subsídiu fim do ano $200 sei termina iha tinan oin.
Tui dadus husi Banku Nasionál Komérsiu Timor-Leste (BNCTL, sigla portugés) benefisiáriu ba subsídiu fim do ano $200 ba uma kain iha Covalima hamutuk 20,243, ne’ebé kompostu hosi postu administrativu Suai 6,572, Zumalai 4440, Tilomar 2,569, Maucatar 3,227, Fatululik 773, Fatumea 1041 no Fohorem 1621.
Autoridade laiha koñesimentu kompañia distribui cesta bázika
Aleinde ne’e, nia hateten, durante ne’e kompañia sira distribui ona sesta bázika ba komunidade iha postu administrativu Fatumea, Fatululik no Tilomar ne’e laiha karta koñesimentu.
“Distribuisaun cesta bázika ohin dadeer ha’u husu iha suku Suai Loro sira seidauk simu foin lalais distribuisaun cesta bázika iha postu Fatululik la tuir kontratu. antes ne’e ha’u hateten ba sira atu distribui cesta bázika pelumenus konsidera ba autoridade lokál sira atu hatene tuir. Maibé kompañia sira-ne’e hatama dokumentu iha nasionál hodi fahe direta ba komunidade no la fó kuñesimentu ba autoridade,” nia informa.
Kompañia ne’ebé distribui cesta bázika fó karta koñesimentu ba autoridade ne’e, kompañia Aitula ne’ebé hahú halo lansamentu iha postu administrativu Zumalai maibé sira seluk laiha koñesementu.
Munisípiu Covalima ho nia postu administrativu sira hanesan Zumalai, Fatululik, Fatumea no Tilomar ne’ebé komunidade sira simu ona cesta bázika maibé komunidade hosi postu administrativu Suai, Maucatar no Fohorem seidauk simu cesta bázika bainhira mak simu lahatene.
“Tuir ha’u-nia hatene kompania ne’ebé distribui ona cesta bázika ba komunidade mak hanesan iha postu Zumalai, Fatululik, Fatumea no Tilomar. Postu administrativu sira seluk, ha’u seidauk rona bainhira mós lahatene ne’e programa hosi nasionál,” nia dehan.
Antes ne’e, iha 05 agostu 2022, Governu liuhosi Sekretáriu Estadu Kooperativa lansa distribuisaun cesta bázika faze daruak iha postu administrativu Zumalai, suku Zulo, munisípiu Covalima ho nia benefisíariu ema na’in-15,161.
Jornalista : Celestina Teles
Editór : Cancio Ximenes
Jornalista : Celestina Teles
Editór : Cancio Ximenes
