Deklarasaun inkonstitusionalidade automátika fundu veteranu iha proposta OJE 2023 laiha efeitu
DILI, 14 dezembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten ho deklarasaun hosi Tribunál Rekursu (TR) inkonstituisionalidade mak automátika ba fundu veteranu biliaun $1 iha proposta-lei Orsamentu Jerál Estadu (OJE) 2023 laiha efeitu ka hasai imediata.
Notísia Relevante: PN simu ona notifikasaun TR relasiona fundu veteranu iha OJE 2023 inkonstitusionalidade
“Ami ko’alia kona-ba promulgasaun Orsamentu Jerál Estadu 2023 ne’ebé ninia parte ida Tribunál Rekursu deklara inkonstitusionál liu-liu verba ida kona-ba fundu veteranu nian. Tribunál dekreta tiha ona ne’e inkonstituisionál fundu ida-ne’e fica sem efeitu,” Prezidente PN hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru Pite, kuarta ne’e.
Nune’e, hakarak ka lakohi Prezidente Repúblika ho Tribunál Rekursu ezerse sira-nia podér konstituisionál ne’e tuir konstituisaun no desizaun Tribunál ne’e prevalese hotu kualkér desizaun Estadu nian
“Tribunál dekreta tiha ona ne’e inkonstituisionál fundu ida-ne’e fica sem efeitu,” nia dehan.
Mezmu nune’e, deklarasaun inkonstituisionalidade ba fundu veteranu la afeta ba Orsamentu Jerál Estadu (OJE) 2023.
“No Prezidente Repúblika, ohin lokra’ik, nia sei promulga Orsamentu Jerál Estadu ho rezerva ida ohin inkonstituisionál,” nia hateten.
PR promulga proposta-lei OJE 2023 exeptu ida Tribunál Rekursu deklara inkonstitusionál ida ne’e laiha efeitu ona ida-ne’e Prezidente Repúblika la promulga, tanba ne’e obrigatóriu tenke hanesan ne’e.
Nia hateten, fundu veteranu ne’e la efeitu ona mak montante proposta OJE 2023 hosi montante inisiál sei iha redusaun biliaun $1 nune’e hela de’it billaun $2-resin.
“Ne’e la signifika Governu laiha ona dalan seluk atu hola medida polítika ruma fó solusaun ba problema veteranu nian,” nia hateten.
Jornalista : Nelson de Sousa
Editór : Cancio Ximenes
