COVALIMA, 14 dezembru 2022 (TATOLI)—Estudante hamutuk na’in-985 husi eskola 211 kompostu hosi ensinu báziku no sekundáriu jerál iha munisípiu Covalima mak sai benefisiáriu bolsa méritu hosi Ministériu Edukasaun Juventude no Desportu (MEJD).
Notísia Relevante: Estudante 3.517 tama lista mellór klasifikadu atu simu prémiu bolsa méritu
“Ita-nia estudante ne’ebé sai benefisiáriu ba bolsa méritu iha tinan 2022, hahú hosi estudante ensinu báziku no eskola sekundáriu jerál na’in-985 hosi eskola 211 ne’ebé estabelese iha munisípiun Covalima,” Xefe departamentu parke eskolár, Manuel França, relata dadus ne’e ba Agência Tatoli, iha nia kna’ar fatin Santa Rosa, kuarta ne’e.
Fó bolsa méritu ba estduante hirak ne’e ho objetivu atu motiva estudante sira no estudante ne’ebé eskola iha postu sira la presiza atu mai iha vila, tanba númeru estudante iha postu menus.
Kritériu atu asesu ba bolsa méritu mak hanesan estudante primeriu siklu no terseiru siklu haree ba valór ezame pasajen ne’ebé sei halo avaliasaun liuhosi ezame afresaun 1 siklu no 2 siklu haree valór matéria Matematika, Portugés, Siénsia Naturál no Siénsia Sosiál.
Benefisiáriu ne’ebé atu asesu ba bolsa méritu na’in-985 husi eskola 211 ne’ebé estabelese iha Covalima ho totál orsamentu $548,150.00.
Estudante ne’ebé sai benefisiáriu ba bolsa méritu hanesan estudante primeiru siklu ensinu báziku hosi 4 ano ba 5 ano ho totál benefisiáriu 435 hosi totál eskola 87 no ho nia orsamentuhamutuk $217,500.00.
Benefisiáriu estudante hosi 2 siklu ensinu báziku hosi 6 ano ba 7 ano ho totál estudante 400 hosi eskola 80 ho nia orsamentu $ 200.000.00.
Nivél eskola 3 siklu 9 ano, benefisiáriu ba bolsa ,éritu ne’e hamutuk 78 ne’ebé mai hosi eskola 26 ho nia orsamentu hamutuk $58,500.00.
Estudante nivél eskolár 12 ensinu sekundáriu jerál ho totál benefisiáriu 12 hosi eskola haat (4), orsamentu $9, 000.00, nivél eskolár 12 ensinu tekniku vokasionál benefisiariu 15 hosi eskola lima (5) ho orsamentu $11,250.00.
Nivél eskola ezame pasajen klase hosi 11 ano ba 12 ano, ensinu sekundáriu jeral benefisiáriu 20 hosi eskola haat (4) ho orsamentu $10.000.00.
Nivél eskola ezame pasazen husi 11 ano ba 12 ano ensinu tekniku vokasional benefisiáriu 25 husi eskola lima (5) orsamentu $ 12,500.00 no bolsu méritu nivél munisípiu ba Ensinu Báziku (EB) no Eskola Sekundaria Jerál (ESG) ho orsamentu $29,400.00
Jornalista : Celestina Teles
Editór : Cancio Ximenes
