Governu aprova Dekretu-Lei ba kriasaun INETL, I.P
DILI, 13 dezembru 2022 (TATOLI)— Governu liuhosi Konsellu Ministru (KM), tersa ne’e, aprova projetu Dekretu-Lei, ne’ebé aprezenta husi Ministru Finansa, Rui Augusto Gomes, ba kriasaun Institutu Nasionál Estatístika Timor-Leste, Institutu Públiku (INETL,I.P) no aprova ninia estatutu ida-idak.
“Ohin, Konsellu Minsitru aprova dekretu-lei no estatutu ba INETL,I.P nian, nune’e ita iha esperansa boot katak INETL, bele servisu di’ak liutan hanesan I.P no bele fó rezultadu ne’ebé di’ak hosi sira-nia servisu, análiza no estudu sira ne’ebé ho kualidade”, hateten Ministru Presidensiál Konsellu Ministru, Fidelis Manuel Leite Mangalhães hafoin reuniaun ezekutivu iha Palásiu Governu.
Objetivu hosi diploma ne’e, iha ámbitu reforma jestaun finansa públika nian ne’ebé daudaun ne’e la’o hela, atu aumenta kapasidade jestaun no autonomia téknika no administrativa autoridade estatístika nasionál, ne’ebé transforma Diresaun-Jerál Estatístika iha Institutu Nasionál Estatístika Timor-Leste hodi hadi’a kualidade, imparsialidade no konfiansa iha estatístika ofisiál sira Estadu nian.
INETL sei sai ema koletiva públika ida, ho forma institutu públiku, ne’ebé integra iha administrasaqun indireta Estadu nian, iha ámbitu Ministériu Finansas nian, dota ona autonomia téknika, administrativa, finanseira, no patrimóniu rasik.
Institutu Públiku ida-ne’e sei asume kna’ar nu’udar autoridade estatístika nasionál no ninia misaun maka atu halo dezeñu, koordenasaun no produsaun ba estatístika ofisiál sira Estadu nian.
Altera Dekretu Governu kona-ba ezekusaun OJE 2022
Alende ne’e, Governu liuhosi Konsellu Ministru (KM), mós aprova projetu Dekretu-Governu, ne’ebé aprezenta husi Ministru Finansa, Rui Augusto Gomes, ba alterasaun dahuluk ba Dekretu Governu númeru 13/2022, 18 janeiru, kona-ba Ezekusaun Orsamentu Jerál Estadu (OJE) ba tinan 2022.
“Objetivu mak atu permite pagamentu adiantadu husi porsentu 20 liuhusi valór kontratu nian, liuhusi utilizasaun dotasaun ne’ebé prevee ona iha OJE 2022. Presiza nafatin aprezentasaun garantia bankária nian ho valór hanesan no aprovasaun husi Ministru Finansa”, hateten Ministru Fidelis Manuel
Medida ne’e sei permite hodi evita kriasaun dívida nian sira no hodi rezolve situasaun kontratu ne’ebé ninia despeza prevee iha OJE tinan 2022, maibé tanba atrazu iha konkluzaun, seidauk bele halo pagamentu no mós seidauk bele halo bazeia ba OJE 2023.
Jornalista : Arminda Fonseca
Editór : Florencio Miranda Ximenes
