DILI, 14 dezenbru 2022 (TATOLI)—Lidér Nasionál no Eis Primeiru-Ministru, Kay Rala Xanana Gusmão, ninia pozisaun klaru tiha ona kadoras mina Greater Sunrise dada mai Timor-Leste.
“Ba imi-ne’ebé ladun akompaña prosesu konsiliasaun ninian atu dehan katak lalika husu ha’u-nia apoiu tanba nu’udar ema ida reprezenta Estadu nia naran ba konsege tiha fronteira máritima. Ne’eduni, pozisaun ha’u-nian klaru tiha ona kadoras mai Timor,” Xanana Gusmão hateten hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, kuarta ne’e.
Notísia Relevante: Governu sei nafatin konsulta Xanana Gusmão ba prosesu dezenvolvimentu Greater Sunrise
Iha loron 12 dezembru ne’e, Ministru Petróleu no Minerál (MPM), Victor da Conceição Soares, hateten Governu rekoñese no nafatin halo konsultasaun ho lidér nasionál Xanana Gusmão ba prosesu dezenvolvimentu Greater Sunrise tanba nia mak hahú uluk to’o ohin loron.
Nune’e, Xanana haktuir sira diskute ho komisaun ho Austrália no kompañia sira durante fulan neen (6) ka liután hodi hatudu Timor-Leste nia pozisaun kona-ba ida-ne’e.
“Tratadu ne’ebé asina iha Nova Iorke só depois ami konsege tiha manán buat sira-ne’e mak foin lori mai sétimu Governu Mari Alkatiri nia Governu konkorda tiha ho tratadu ne’e mak haruka ba sekretáriu jerál,” nia dehan.
Tratadu ne’e, iha akordu ne’e iha tan anexu temi kona-ba ida-ne’e komisaun konsiliasaun sira hasoru malu besik tinan ida hotu tiha, konkorda malu tiha, nune’e sétimu Governu aprova ho Governu Austrália nune’e tratadu haruka ba Nova Iorke.
“Maibé antes buat ne’e mai bele to’o iha Governu ida-idak, ami sei diskute kle’ur fali la’ós fronteira máritima ona maibé kona-ba Greater Sunrise ne’ebé ha’u-nia pozisaun iha ne’eba lalika husu ha’u-nia apoiu tanba loos tiha kedas, klaru ona dehan ida-ne’eba (Kadoras Greater Sunrise) tenke mai iha ne’e (Timor-Leste),” nia hateten.
Nune’e, nia hatutan, konsege konvense Prezidente komisaun ho tan advogadu ida hosi Komisaun konsiliasaun ne’e.
“Sira mai to’o iha ne’e ba to’o iha Suai hodi ami esplika tanbasá ami defende argumentu sira-ne’ebé ami lori ba iha ne’eba ne’e. Sira fila-fali, ami ba fali to’o Singapura konkorda tanba buat sira-ne’e mak la’o,” nia haktuir.
Notísia Relevante: Empreza Woodside: Sedu liu diskute ‘timeline’ dezenvolvimentu Greater Sunrise
Jornalista : Nelson de Sousa
Editór : Cancio Ximenes
