VIQUEQUE, 15 dezembru 2022 (TATOLI)— Xefe Sentru Munisipíu Viqueque, Celestina Soares, informa hahu iha jullu to’o dezembru tinan 2022, inan isin rua mak partu iha Sentru Kuidadu Emerjénsia Obstetriku Neonatal Báziku (KEmON-B).
“Depois estabelese Sentru KEmON-B hahu iha fulan jullu to’o dezembru 2022 ne’e, fó ona atendementu partu ba inan isin rua hamutuk 144. Hosi total ne’e, inan isin rua na’in-38 no bebe na’in rua maka ami halo transferensia ba Hospital Referal Baucau tanba kondisaun grave, no ami labele halo atendementu iha sentru KEmON-B,” Xefe Sentru Saude Viqueque Villa, Celestina hateten ba jornalista sira iha postu Viqueque Villa, kinta ne’e.
Nia hatutan, estabelesementu Sentru KEmON-B ne’e pesoal saúde sira tuir ona formasaun hafoin halo atendementu ba inan isin rua sira iha munisípiu Viqueque ho moras komplikasaun.
Notisia relevante : MS inaugura sentru KemON-B no fatin seguru iha Viqueque
“Pesoal saúde sira halo atendementu ba inan isin rua, maibe kuandu ho kondisaun grave foin transfere ba Hospital referal. Ita kompara iha tempu uluk seidauk iha Sentru KEmON-B, ita ninia ekipamentu limitadu los, maibé agora ekipamentu sufsiente hodi halo atendementu ba inan isin rua sira ne’ebe atu mai partu”, nia dehan.
Nune’e ba oin presiza fo kapasitasaun ba pesoal saúde sira no presiza iha doutór espesialista atu labele transfere inan isin rua sir aba hospital referral.
Entretantu pesoal saúde serbisu iha KEmON-B Viqueque iha parteira treinadu hamutuk na’in haat no mediku na’in rua.
Jornalista : Vitorino Lopes da Costa
Editóra : Armandina Moniz
