VIQUEQUE, 16 dezembru 2022 (TATOLI)—Polísia Nasionál Timor-Leste (PNTL) munisípiu Viqueque liuhosi Unidade Tránzitu rekolla koima hosi utilizadór estrada hamutuk $12.417, hahú janeiru to’o dezembru tinan ne’e.
“Ami implementa dekretu-lei númeru 06/2003 kona-ba rejime tránzitu, konsege rekolla koima hamutuk $12.417 ba kofre Estadu. Taxa ida-ne’e durante tinan-ida nian,” Komandante PNTL munisípiu Viqueque, Superentendente Polísia, Sebastião Alves Quintão, hateten, iha ninia knaar fatin, Beskem, sesta ne’e.
Aleinde ne’e, Komandante Polísia ne’e fó ona orientasaun ba Unidade Tránzitu no ekipa task force hodi halo check point regular hodi haree ba ema sira ne’ebé viola kódigu estrada.
“Dala ruma motorista sira uza motorizada la uza kapasete no pasajeru sira tur iha karreta ninia kapon, ne’ebé aktu sira-ne’e lei bandu. Komandu PNTL Viqueque iha obrigasaun hodi halo kontrolu ba ema sira ne’ebé viola kódigu estrada, hakarak ka lakoi tenke fó sansaun selu koima ba Estadu,” nia akresenta.
Notísia relevante: PNTL Viqueque rekolla koima infrasaun kódigu estrada $1.152 iha janeiru-novembru
Koima ne’ebé rekolla hosi violasaun kódigu estrada hahú janeiru $341, fevereiru $934.00, marsu $932, abril $252, maiu $1.127, juñu $1.333, jullu $1.227, agostu $1.676, setembru $1.223, outubru $1.107, novembru $988 no dezembru $1.267.
Unidade Tránzitu sei kontinua halo operasaun ba transporte sira hodi kontrola movimentu iha tempu natál no tinan foun nian.
Jornalista : Vitorino Lopes da Costa
Editora : Julia Chatarina
