DILI, 16 dezembru 2022 (TATOLI)—Amu Pároku São José Ai-mutin Dili, Emanuel Lelo Talok, hateten, uma-kreda prepara semana haat atu simu natál.
“Yempu adventu ne’e uma-kreda prepara semana haat atu simu natál, ne’ebé durante semana haat ne’e fahe liturjia ko’alia kona-ba Jesus atu mai, preparasaun nu’udar ema tenke prepara fuan, ko’alia kona-ba inan Maria Virjen ne’ebé kous no prepara atu hahoris Jesus. Ita hotu hatene Jesus nia prezensa iha mundu ne’e nu’udar xave ba salvasaun mundu nian,” Amu Pároku São José Aimutin, hateten ba Agência Tatoli liuhosi programa entrevista eskluziva, iha estúdiu Farol, sesta ne’e.
Nia dehan, semana haat ne’e ba sarani katólika atu la’o tuir lala’ok adventu nian, hanesan hakle’an liturjia, orasaun, no bíblia sira ne’ebé loron ba loron Tatoli mai sarani sira kona-ba preparasaun etapa haat ne’e.
“Durante semana haat ne’e di’ak tebes ba sarani katólika tanba adventu ne’e ita tama ona litúrjiku foun, nune’e antes tama ba natál ita tenke prepara-an hanesan tuir misa loron-loron, rona Maromak nia liafuan atu hatene kona-ba Jesus nia prezensa ne’e atu halo saida, halo asaun karidade no seluk tan,” nia akresenta.
Notísia relevante: PNTL Dili prepara efetivu 500-resin asegura selebrasaun Santo Natál-Tinan Foun
Adventu fahe ba tempu rua, parte dahuluk mak hahú loron adventu iha fulan ikus novembru nia to’o loron 16 dezembru no tempu daruak adventu nian mak hahú loron 17 to’o 24 dezembru.
“Preparasaun di’ak tebes ba ita antes to’o natál mak tuir misa loron-loron rona Maromak nia liafuan, tuir retiru, halo reflesaun, konfesa no seluk tan,” Padre Emanuel hameno.
Nia esplika, loron adventu hahú to’o loron 16 dezembru ne’e hanesan preprasaun jerál de’it maibé hahú 17 dezembru ba leten ne’e, intensivamente tenke hala’o tanba Maromak nia oan nia prezensa ne’e besik mai ona.
“Prepara ita ba solenidade loron natál nian no natál signifika loloos loron ne’ebé ksolok nia atu ema barak selebra hamutuk hodi simu Jesus nia prezensa. Ita hotu hatene Jesus Maromak oan buat-hotu ba nia iha maibé moris mai halo nia-an hanesan ema-kiak ida-ne’e hanorin ita labele lakon esperansa hodi fó forsa ba ita atu luta tuir nia katak fiar iha nia buat hotu sei sai di’ak,” Amu ne tenik.
Padre konsidera natál importante ba sarani atubele komprende Maromak tanba Maromak mai ona halo nia-an simples iha sarani nia le’et, Maromak halo nia-an simples atu ema-nia kakutak ne’ebé kloot ne’e bele komprende Maromak.
“Maromak liuhosi nia inkarnasaun ne’e atu ita koñese liután hahú hosi bebe, tempu ba ita atu koñese, hadomi moris ho Maromak no haklaken maromak,” nia salienta.
Jornalista : Arminda Fonseca
Editora : Julia Chatarina
