DILI, 16 dezembru 2022 (TATOLI)—Universidade Nasionál Timor-Lorosa’e (UNTL) no Institutu Politékniku Betano (IPB) submete ona lista naran estudante foun hamutuk 4.150 tinan letivu 2023 ba Ministériu Ensinu Superiór Siénsia no Kultura (MESSK).
Vise-Reitór UNTL ne’ebé trata asuntu Akadémiku no Garantia Kualidade, Samuel Venâncio de Sousa Freitas, hateten, proposta númeru estudante ne’ebé hato’o bazeia ba kondisaun ne’ebé fakuldade sia iha.
“Ami-nia proposta ba ministériu bazeia ba kondisaun iha departamentu no fakuldade. Ha’u halo ona konsultasaun ho ami-nia Diretór no nia dehan ba tinan 2023 ne’e UNTL presiza tan estudante foun hamutuk 3.750,” Vise-Retór informa iha salaun Katedrál Vila Verde, sesta ne’e.
Notísia relevante: Fakuldade sira propoin kuota estudante UNTL 3.500 ba tinan akadémiku 2023
Nune’e, Komisaun Asesu Engeresu Ensinu Superiór (KAEES) sei fó sai rezultadu totál alunu foun admitidu.
“Númeru aumenta ka menus, ida-ne’e sei haree filafali no rezultadu sei fó sai hodi hakat ba prosesu engresu. Bainhira ami-nia kalendáriu ba prosesu engresu estudante admitidu iha tinan letivu 2023 nian prontu hotu ona maka ami prevee aula ba alunu tuan inklui alunu foun sira,” nia akresenta.
Estudante 3.750 ne’ebé universidade nasionál propoin sei koloka mós ba departamentu foun rua ne’ebé foin ativu tan hanesan kursu siénsia solu hosi fakuldade Agrikultura inklui kursu edukasaun fízika desportu hosi fakuldade Edukasaun Arte no Umanidade (FEAH) ne’ebé foin maka hetan akreditasaun.
Iha fatin hanesan, Prezidente IPB, Acácio Cardoso Amaral, relata, parte institutu propoin estudante foun hamutuk 400 bazeia ba kondisaun.
“Ami presiza tan de’it estudante 400 tanba ami simu relatóriu hosi departamentu no fakuldade sira, nune’e bazeia ba kondisaun no fasilidade sira maka ami husu tan estudante,” nia dehan.
Fakuldade rua ne’ebé eziste iha IPB mak hanesan fakuldade produsaun animál, presiza tan estudante 200 no fakuldade konstrusaun sivil presiza 200.
Jornalista : Tomé Amado
Editora : Julia Chatarina
