DILI, 19 dezembru 2022 (TATOLI)—Polísia Nasionál Timor-Leste (PNTL) Viqueque aprezenta ona suspeitu rua ho inisiál AS no ACA ne’ebé lori kilat hosi Dili tama ba Viqueque, ba Ministériu Públiku (MP).
“Iha prosesu identifikasaun, ami haree kilat manu ne’e bele hamate ema, nune’e momentu ne’ebá ami halo identifikasaun ba suspeitu haat maibé iha prosesu identifikasaun suspeitu loloos ne’e ema na’in-rua, nune’e ami aprezenta ona ba Ministériu Públiku,” Komandante PNTL munisípiu Viqueque, Superintendente, Sebastião Alves Quintão, informa via telefónika, segunda ne’e.
Ekipa seguransa halo apreensaun ba kilat manu hamutuk tolu no tudik iha parte Asabere, suku Ossu de Cima, postu Ossu, munisípiu Viqueque iha maizumenus tuku 21:49 kalan, loron 18 novembru, ne’ebé iha kareta laran iha pasajeiru mane haat atu halo viajen ho karreta marka Grand Max hosi Dili bá postu administrativu Uatulari.
Notísia relevante: PNTL Viqueque halo apreensaun kilat manu no tudik iha Ossu
PNTL aprezenta ona evidénsia ba MP no hein notifikasaun hafoin lori suspeitu rua halo julgamentu iha Tribunál.
Inisiativa ne’e bazeia ba lei númeru 5/2017 19 abril kona-ba prátika arte marsiál, rituál, kilat, rama ambon inklui alterasaun dalimak ba kódigu penál.
“Ami sei kontinua implemente lei númeru 5/2017 hodi halo apreensaun ba arma branka sira ne’ebé lei bandu,” nia akresenta.
Aleinde ne’e, autoridade seguransa sei kontinua halo apreensaun ba sidadaun sira ne’ebé ho kilat manu ba kasa animál fuik sira.
“Ba komunidade sira ne’ebé lori arma branka sira-ne’e, ami konsidera hanesan ameasa ida. Tanba ne’e, Komandu iha obrigasaun kontrola arma branka sira,” nia tenik.
Jornalista : Vitorino Lopes da Costa
Editora : Julia Chatarina
