Suku Lontas devolve $11,400 ba BNCTL hosi subsídiu $200
BOBONARO, 19 dezembru 2022 (TATOLI)-Xefe suku Lontas, postu Administrativu Lolotoe, munisípiu Bobonaro, Alípio Belo, deside devolve hikas orsamentu $11,400 ba Banku Nasionál Komérsiu Timor-Leste (BNCTL sigla portugés) hosi orsamentu programa subsídiu uma-kain fim do ano $200 hodi hatama ba kofre estadu tanba la konsege ezekuta.
Tuir dadus benefisiáriu suku Lontas ne’ebé aprovadu hosi Ministériu Solidariedade Sosiál no Inkluzaun (MSSI) hamutuk na’in-240 ho montante orsamentu rihun $48.
Hosi montante rihun $48 ne’e halo pagamentu ba aldeia tolu komposta hosi aldeia Piron iha benefisiáriu na’in-72 ho totál orsamentu rihun $14,400, aldeia Ozo 75 ho totál orsamentu rihun $15 no aldeia Tasmil na’in+93 ho totál orsamentu $18,600.
Maibé iha prosesu pagamentu ne’e hahú hosi loron (15/12) no finaliza iha sábadu (17/12) konsege distribui de’it ba benefisiáriu na’in-183 ho totál orsamentu rihun $36,600.
Notísia relevante: Xefe suku Odomau identifika problema tolu iha pagamentu subsídiu $200
“Ami-nia suku hasoru problema iha dadus pendente na’in-57 ho razaun tanba mate no dadus dupla. Ho ida-ne’e mak ha’u hanesan xefe suku foti desizaun hodi devolve fali osan restu ne’ebé sei entrega ba BNCTL hamutuk $11,400,” Xefe suku Lontas, Alípio Belo, informa ba Tatoli, segunda ne’e.
Xefe suku ne’e haktuir, komunidade agregadu familiár suku Lontas agradese ba polítika VIII Governu Konstitusionál kona-bá subsídiu $200.
Maibé liurai Lontas ne’e sente triste oituan tanba iha xefe família na’in-34 mak naran la mai, maske lista submete ona ba Sentru Solidariedade sosiál no Inkluzaun munisípiu Bobonaro.
“Ami husu ba Ministériu Administrasaun Estatál no Ministériu Solidariedade Sosiál atu rezolve lalais tanba sidadaun hotu iha direitu hanesan, atu nune’e sira mós bele sente governu nia programa ida-ne’e iha loron boot Natál ho tinan foun,” nia fó hanoin.
Notísia relevante: Komunidade Lour agradese polítika Governu kona-bá subsídiu $200
Jornalista: Sérgio da Cruz
Editór: Evaristo Soares Martins
