Komunidade Lour agradese polítika Governu kona-bá subsídiu $200
BOBONARO, 16 dezembru 2022 (TATOLI)-Xefe suku Lour, postu administrativu Bobonaro, munisípiu Bobonaro, Miguel Lopes Gomes, haktuir komunidade agragadu familiár sira sente kontente no agradese ba polítika VIII Governu Konstitusionál ne’ebé fó subsidiu uma-kain fim do ano ho montante $200.
Notísia relevante: PA Bobonaro husu komunidade labele uza subsídiu $200 ‘taru’ kopa mundiál
“Ha’u-nia komunidade sira sente orgullu no agradese ba polítika VIII Governu Konstitusionál nian programa ida fó subsídiu fim do ano ba ho hanoin di’ak ida, governu fó ba komunidade atu goja iha loron Natál no tinan foun ho família,” nia informa ba Tatoli, sesta ne’e.
Nia haktuir, prosesu pagamentu ne’e la’o dezde loron kinta, 15 dezembru no 16 dezembru ba ona aldeia Tazgolo.
Autoridade lokál ne’e fundamenta, maske suku Lour konsidera hanesan área remota ne’ebé dok hosi vila maibé atendimentu eletroníku sira atu foto kópia ba xefefa família no kartaun eleitorál mós iha kedas áreador sede suku.
“Ami-nia prosesu pagamentu la’o di’ak, normál hela, laiha problema tanba ekipa pagamentu kompostu hosi MSSI, pesoál suku, xefe aldeia sira serbisu hamutuk atu fó susesu ba programa ne’e,” Xefe suku Miguel akresenta.
Prosesu pagamentu ne’e hetan seguransa hosi Ofisiál Polísia Suku (OPS) mai hosi eskuadra postu administrativu Bobonaro.
Enkuantu totál xefe família iha suku Lour ne’ebé sai benifísiariu ba subsídiu ne’e hamutuk 313 mai hosi aldeia Tazgolo, Galitas, Helikei no Olo-Olo.
Notísiasia relevante: MSSI husu autoridade fó prioridade inan isin-rua iha pagamentu subsídiu $200
Jornalista: Sérgio da Cruz
Editor: Evaristo Soares Martins
