DILI, 15 dezembru 2022 (TATOLI)—Vise Ministra Solidariedade Sosiál no Inkkuzaun (MSSI), Signi Verdial, husu autoridade lokál atu tau prioridade ba inan isin-rua sira iha prosesu pagamentu subsídiu fim do ano $200 iha terrenu.
Asuntu ne’e, Vise-Ministra Solidariedade Sosiál no Inkluzaun, Signi Verdial, hateten bainhira halo monitorizasaun ba pagamentu subsídiu fim do ano $200 ba uma kain ne’ebé hala’o iha suku Sau, munisípiu Manatuto.
“Husu komunidade no autoridade sira-nia kooperasaun no kompreensaun atu fó prioridade ba inan isin-rua no ferik katuas sira-ne’ebé ninia kondisaun saúde ladún di’ak, inan isin-rua inklui ema ho defisiénsia,” Signi Verdial hateten liuhosi komunikadu imprensa ne’ebé Agência Tatoli asesu, kinta ne’e.
Nune’e, Vise MSSI husu ba komunidade nia pasiénsia atu nune’e pagamentu bele la’o di’ak no hotu-hotu bele hetan ninia direitu ba subsídiu refere.
Atu komunidade ne’ebé iha saláriu mensal $500 ba leten husu atu labele simu subsídiu $200, tanba daudaun ne’e instituisaun CAC no PDHJ monitoriza hela pagamentu subsídiu ida-ne’e.
Xefe Suku Sau, Barbara Gama Soares, hateten agradese no kontente tanba Estadu no Governu ne’e bele atribui $200 ne’e.
“Ami orgullu no agradese ba Vise-Ministra MSSI tanba bele mai vizita ami-nia suku hodi monitoriza pagamentu subsídiu fim do ano $200 ba uma kain,” nia dehan.
Benefisiáriu subsídiu fim do ano $200 ba uma kain, Egas Pinto, hateten kontente tanba osan $200 ne’e sei halo festeza natál ba tinan ida-ne’e.
“Bainhira ami simu osan $. 200,00, ami sente kontente tebes no ami agradese ba Governu tanba ho osan ida-ne’e bele ajuda ona ami hodi uza ba festa natál 2022 no tinan foun 2023,” nia dehan.
Jornalista : Osoria Marques
Editór : Cancio Ximenes
