iklan

EKONOMIA, HEADLINE

Feira nasionál ba promosaun produtu lokál sei realiza durante fulan-ida

Feira nasionál ba promosaun produtu lokál sei realiza durante fulan-ida

Ministru Turizmu Komérsiu no Indústria, José Lucas do Carmo da Silva. Imajen Tatoli/Egas Cristóvão

DILI, 20 dezembru 2022 (TATOLI)–Governu liuhosi Ministériu Turizmu Komérsiu no Indústria (MTKI), tersa ne’e, ofisialmete lansa feira nasionál ba promosaun produtu lokál iha Portu Dili, Colmera, ne’ebé sei realiza durante fulan-ida, hahú loron 20 dezembru 2022 to’o 20 janeiru 2023.

Ministru Turizmu Komérsiu no Indústria, José Lucas do Carmo da Silva, hateten, objetivu realiza atividade ne’e iha ámbitu selebrasaun festa natál tinan 2022 no simu tinan toun 2023, inklui hakarak fó oportunidade ba setór privadu, empreendedór mikro, pekena no média empreza sira iha nível lokál no nasionál bele partisipa hodi hatudu produtu lokál, nune’e vizitante sira bele mai hola no halo kontaktu ema ho ema, buka halo konvivénsia hodi hetan koñesimentu, iha ideia inovadór no loke oportunidade ba kooperasaun entre parte interesadu sira.

“Feira ida-ne’e bazeia ba despaixu hosi ita-nia Primeiru-Ministru, hodi halo promosaun ba produtu lokál ne’ebé ita iha no mós halo espozisaun ba progresu sira ne’ebé VIII Governu halo ba kada ministeriál no setorál sira hotu,” Ministru hateten.

Notísia relevante: Enserra feira nasionál, MTKI enkoraja setór privadu ativu eventu hanesan

Aleinde ne’e, inisiativa realiza programa ne’e tanba bazeia ba observasaun durante tinan-lima nia-laran, ekonomia Timor-Leste hasoru dezafiu boot tanba situasaun dinámika polítika ne’ebé afeta ba estabilidade governativa, COVID-19, dezastre naturál, inklui estabilidade polítika globál ne’ebé afeta ba ekonomia família, komunidade no nasaun.

Tanba ne’e, Governu hamutuk ho setór privadu no empreendedór sira buka nafatin atu hamosu oportunidade negósiu hodi tulun mikro, pekena no média empreza sira atu halo atividade negósiu hodi hetan evolusaun no transformasaun iha kultura negósiu, hosi negósiu tradisionál ba negósiu modernu ho sistema dijitalizasaun, hahú hosi negósiu grosir to’o retallu.

“Orsamentu ne’ebé ita prepara ba atividade ne’e, Ministériu Turizmu Komérsiu no Indústria rasik hanesan komisaun organizadora ba eventu ne’e $600.000, la inklui ba kada liña ministeriál, ne’ebé ida-idak iha ninia orsamentu rasik,” nia akresenta.

Produtu lokál ne’ebé halo promosaun iha feira ida-ne’e mak hanesan ai-han lokál, kulinária, artezenatu, no seluk tan.

“Eventu ne’e importante ba komunidade nia partisipasaun tanba feira ida-ne’e ba povu. Tanba ne’e, Governu hamutuk ho setór privadu no empreendedór sira tau esforsu hamutuk hodi organiza feira nasionál ba promosaun produtu lokál ida-ne’e hodi bele promove edukasaun, inovasaun no kooperasaun entre parte  aprezentadór no vendedór, ho vizitante no kompradór, ho misaun koletivu hala’o esforsu hodi promove hosi parte polítika ba asaun hodi implementa no atinje objetivu polítika nasionál ne’ebé hatúr turizmu nu’udár prioridade, lori prosperiedade, halo pareseria ho stakeholders sira hotu,” governante ne’e dehan.

Feira ne’e nu’udár meiu ida atu halo promosaun no merkadu Timor-Leste ba mundu.

“Tanba ne’e, mai hotu-hotu uza didi’ak oportunidade feira ida-ne’e hodi promove Timor-Leste nu’udár destinu turístiku úniku, inluzivu, sustentável no responsável iha dame nia laran hodi halo dezenvolvimentu no hetan moris di’ak,” Ministru enkoraja.

Iha fatin hanesan, Diretór Jerál MTKI, Jelino Soares, hateten, setór privadu sira ne’ebé rejistu iha MTKI atu partisipa iha feira nasionál ne’e ba arzenatu hamutuk 25 no ba komersiante ai-han no bebida hamutuk 10 resin.

“Ita-nia feira ne’e lais, entaun ita la’o de’it ona mak ita kontinua simu sira tanba feira ne’e rasik hala’o durante fulan-ida,” nia esplika.

Jornalista   : Arminda Fonseca 

Editora        : Julia Chatarina

iklan
iklan

Leave a Reply

iklan
error: Content is protected !!