Enserra feira nasionál, MTKI enkoraja setór privadu ativu eventu hanesan
DILI, 20 maiu 2022 (TATOLI)—Ministériu Turizmu Komérsiu no Indústria (MTKI), sesta ne’e, halo enserramentu atividade feira nasionál ne’ebé realiza iha ámbitu komemorasaun loron restaurasaun indepedénsia Timor-Leste ba da-XX, ne’ebé antes ne’e halo abertura iha loron 16 maiu.
Ministru Turizmu Komérsiu no Indústria, José Lucas do Carmo da Silva, hato’o apresiasaun ba komunidade ne’ebé mak koopera di’ak tebes durante atividade la’o to’o ramata.
“Ha’u nafatin enkoraja setór privadu sira atu ativu liután eventu sira hanesan ne’e, nune’e bele hametin liután lasu komersiál entre produtór ho sosa-na’in sira iha futuru,” Ministru hato’o diskursu iha serimónia enserramentu atividade, iha Sentru Konvensaun Dili (CCD, sigla portugés).
Tuir governante ne’e, razaun Governu realiza feira nasionál, atu dezenvolve no introdús merkadu setór produtivu sira iha área turizmu, komérsiu no indústria nian, inklui agrikultura no kooperativa.
“Feira nasionál sai hanesan atividade promosaun ida hodi bele promove no dezenvolve ekonomia ne’ebé metin, bazeia ba produsaun no produtividade hodi garante bem-estar povu Timor-Leste iha setór ekonomia,” nia akresenta.
Notísia relevante: Feira nasionál iha ámbitu restaurasaun independénsia introdús merkadu setór produtivu
Iha fatin hanesan, Komersiante, Rosa Madeira, ne’ebé durante ne’e fa’an produtu lokál iha feira nasionál ne’e, hateten, nia parte haksolok tebes tanba bele partisipa iha feira.
“Ha’u kontente bele mai partisipa feira nasionál ne’e, tanba durante ne’e ha’u fa’an produtu sira iha munisípiu Liquiçá de’it no kada loron hetan rendimentu sa’e liu $10 no tun liu $5, maibé ha’u mai partisipa iha feira ne’e kada loron ha’u bele hetan rendimentu $50 ka liu,” nia haktuir.
Nune’e, Rosa Madeira, husu ba Governu, ba oin bele loke tan feira nasionál, labele hein tinan ida mak loke dala-ida.
Produtu ne’ebé negosiante sira fa’an mak hanesan luhu, pasta oan, brinkus, kelu no seluk tan, ne’ebé halo ho tais ho folin hahú hosi $0,50 to’o $5
Na’in ba grupu kreativu Jalo, Inácio Soares, hateten, sira-nia grupu halo atividade artezenatu okir paralon transforma sai imajen.
“Feira ne’ebé ita-nia Governu realiza iha tinan ne’e di’ak tebes, tanba liuhosi feira sira hanesan ne’e, joven kreativu sira bele hatudu kreatividade durante loron-lima. Ha’u partisipa iha feira ne’e no hetan rendimentu oituan, maibé ha’u kontente tebes tanba liuhosi feira ha’u bele halo promosaun ba hau-nia artezenatu ne’ebé ha’u halo, ema barak gosta no haruka ha’u atu halo tan,” nia konta tuir.
Inácio Soares husu ba Governu, hodi nafatin loke feira hanesan, nune’e joven sira ne’ebé iha talentu no kreatividade kona-ba artezenatu no seluk tan bele aplika telentu.
Sasán ne’ebé nia fa’an ho folin hahú hosi $10 to’o $20, no durante nia fa’an bele hetan rendimentu to’o $80.
Iha enserramentu atividade ne’e, MTKI atribui prémiu osan ba manán-na’in sira ne’ebé partisipa iha kompetisaun hanesan soru tais, fotografia no tiket ró bá-mai Atauro-Dili, ne’e partisipante na’in-10 mak dada rifa hodi hetan tiket gratuita.
Nune’e, atividade enserramentu ne’e realiza hosi Ministru José Lucas, akompaña hosi Vise-Ministra Turizmu Komunitáriu no Kulturál, Inácia da Conceição Teixeira, inklui konvidadu sira.
Jornalista : Arminda Fonseca
Editora : Julia Chatarina
