PN aprova votu pezár ba falesimentu jornalista Jill Jolliffe
DILI, 20 dezembru 2022 (TATOLI)—Parlamentu Nasionál (PN), tersa ne’e, liuhosi reuniaun plenária aprova votu pezár ba falesimentu jornalista Australiana, Jill Jolliffe, ne’ebé hakotu iis iha loron 02 fulan-dezembru tinan ne’e.
Notísia Relevante: Jill Jolliffe bele mate maibé espíritu lia-loos sei la mate
“Rezultadu votasaun a-favór 51, kontra no abstensaun 0, nune’e aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN.
Tuir testu hosi deputadu proponente David Dias Mandati (Fretilin), Maria Angelina Sarmento (PLP) ba votu pezár refere ne’ebé sekretária meza lee sai katak, Jill Jolliffe akompaña luta libertasaun nasionál prezente iha Dili bainhira Prezidente Francisco Xavier Amarál, proklama imdependénsia Repúblika Timor-Leste unilateralmente iha 28 novembru 1975.
Jill Jolliffe sai testamuña primeiru invazaun ilegál tropa Indonézia iha territóriu Timor-Leste no relata ba mundu asasinatu jornalista na’in-lima iha Balibo, no eventu ne’e nia responsavél halo dokumentáriu ida no livru istória ida ho títulu Balibo Five.
Serbisu jornalista Austrália ne’e propozitu akontesimentu iha Balibo dezempeña papél iha desiminasaun globál kauza imdepedénsia Timor-Leste. Iha tinan 1994, Jill Jolliffe ba iha foho ho objetivu hasoru ho lidér rezisténsia, Nino Coni Santana.
Notísia Relevante: In memoriam Nino Konis Santana: Domin no esperansa ba Nasaun
Hafoin ne’e, konklui dokumentáriu mantein kontribui luta auto-determinasaun Timor-Leste iha ajenda globál, depois Jolliffe kontinua ba iha Portugál 1978-1999 halo reportajen kona-ba Portugál, Angola no kolónia Portugés sira seluk aliened Timor-Leste.
Iha 20 setembru 2014, Estadu atribui medalla órden solidariedade Timor-Leste ho simbolu gratidaun ba ninia kontribuisaun kauza timoroan.
Nune’e, PN liuhosi sesaun plenária manifesta pronfundu ba falesimentu Jill Jolliffe no aprezenta sentidu kondolénsia ba família em-lutada ho amigu sira.
Deputada proponente, Maria Angelina Sarmento, konsidera asaun jornalista Australiana ne’e merese duni hetan rekoñesimentu ida liuhosi votu pezár ne’ebé ita fó ba nia nu’udar jestu apresiasaun no agradesimentu ba kontribuisaun ne’ebé nia fó ona.
“No agradese mós ba nia liuhosi memória instituisionál liuhosi livru ne’ebé nia hakerek hodi hosik hela ba ita timoroan sira no mós ba ema barak atu hatene kona-ba kauza Timor-Leste,” nia dehan.
Notísia Relevante: Xanana Gusmão triste ho Jill Joliffe nia mate
Jornalista : Nelson de Sousa
Editór : Cancio Ximenes
