Uma-kain 250 iha suku Obulo Ermera asesu ona liña eletrisidade
DILI, 20 dezembru 2022 (TATOLI)—Eletricidade de Timor-Leste, Empreza Públika (EDTL, E.P) ofisialmente halakan ona eletrisidade ba uma-kain 250 iha suku Obulo, postu administrativu Atsabe, munisípiu Ermera, iha segunda (19/12).
Vise-Prezidente Konsellu Administrasaun EDTL, E.P Humberto Pereira, hateten, liña eletrisidade ne’e tama iha projetu eletrifikasaun nasionál pakote 34.
“Ha’u husu ba komunidade ne’ebé ohin asesu ona liña eletrisidade, atu uza eletrisidade ho kuidadu, seguru no responsabilidade, karik iha difikuldade ka fallansu ruma tenke informa kedas ba EDTL, E.P munisípiu Ermera hodi halo intervensaun. Ita-boot sira sei asesu gratuita durante fulan-neen, hafoin mak monta kontadór,” Humberto Pereira, hateten liuhosi nota ne’ebé Agência Tatoli asesu, tersa ne’e.
Notísia relevante: EDTL finaliza ona projetu liña eletrifikasaun komunitária tolu iha Bobonaro
Iha biban hanesan, Xefe Suku Obulo, Domingos Maia, lori komunidade nia-naran, agradese ba esforsu ekipa téknika EDTL, E.P ne’ebé halo ona esforsu hodi instala eletrisidade iha suku Obulo.
“Ami suku Obulo durante tinan-20 resin ona moris iha nakukun laran, maibé ohin ami hotu kontente tanba ami hetan ona naroman, ami sente hela ona iha lalehan,” nia tenik.
Implementasaun programa eletrifikasaun nasionál pakote 34 hodi halo instalasaun foun iha munisípiu Ermera, kompostu hosi suku Laclo ba Ailaku Atsabe, suku Obulo to’o Nunumea, suku Parami to’o Aci, EBC Era-Ulu to’o sede suku Era-Ulu, Letefoho, suku Humboe to’o aldeia Hatali.
Jornalista : Arminda Fonseca
Editora : Julia Chatarina
