DILI, 20 dezembru 2022 (TATOLI)—Diretór Ezekutivu Cobselho de Imprensa (CI), Rigoberto Monteiro, informa hafoin prezidente CI Virgílio da Silva Guterrese hato’o pedidu rezignasaun, liuhosi plenária estraordinária, membru CI indika Francisco Simões da Costa Belo sai Prezidente Interinu CI ba mandatu fulan tolu.
Notísia Relevante: Virgílio Guterres ‘Lamukan’ eleitu sai Provedór PDHJ períodu 2023-2026
“Liuhusi ita-nia plenária Konsellu Imprensa nian katak ami hili Francisco Simões mak sei lidera CI durante fulan tolu,” Diretór Ezekutivu Conselho de Imprensa (CI) ne’e hateten ba jornalista sira, iha salaun CI Quintal Boot, Dili.
Prezidente Interinu eleitu, Francisco Simões, hato’o agradesimentu tanba fó fiar ba nia hodi lidera CI durante fulan tolu nia-laran.
“Ha’u agradese ba kolega Konsellu Imprensa ne’ebé fó fiar mai hodi sai Prezidente CI durante loron 90 nia-laran,” nia dehan.
Ho ida-ne’e, nia dehan, sei hamutuk ho membru Asosiasaun Jornalista Timor-Leste atu halo konferénsia ida hodi nomea fali membru ida reprezenta jornalista timoroan sira hodi troka Virgílio Guterres nia fatin.
Prezidente sesante CI, Virgílio da Silva Guterres, apresia ba membru Conselho de Imprensa hotu nia apoiu no kontribuisaun durante iha ninia mandatu lidera CI ne’e.
“Iha biban ne’e, ha’u hato’o ha’u-nia pozisaun ba públiku no kolega jornalista sira, katak apoiu ne’ebé fó mai ha’u ne’e, ha’u apresia no agradese no parabéns ba prezidente interinu eleitu CI, Francisco Simões,” nia dehan.
Karta rezignasaun ne’ebé Virgílio da Silva Gueterres submete iha plenária ordinária Conselho de Imprensa iha segunda (19/12) ne’e, husu atu rezigna an tanba iha 12 dezembru 2022, Parlamentu Nasionál (PN) eleze ona nia nu’udar Provedór ba Provedoria Direitu Humanu no Justisa (PDHJ) ba períodu 2023 to’o 2027.
Jornalista : Osoria Marques
Editór : Cancio Ximenes
