DILI, 21 dezembru 2022 (TATOLI)—Dirasaun Nasionàl Prevensaun Konflitu Komunitária (DNPKK) hamutuk ho autoridade Covalima realiza asaun dame ba grupu arte marsiál (GAM) iha munisípiu Covalima.
Notísia Relevante: KRAM disemina matadalan lima ba GAM iha Covalima
“Mai iha-ne’e hala’o palku dame. Ha’u hanoin iha tinan 2023, molok eleisaun ita prepara ona kampaña dame, nune’e bele asegura festa dame di’ak liután ema hotu bele dezenvolve rai- ne’e,” Diretór Dirasaun Nasionàl Prevensaun Konflitu Komunitária (DNPKK), António Viegas, hatetetn liuhosi diskursu iha Kampu Ladi, Covalima, kuarta ne’e.
Razaun DNPKK realiza asaun dame, tanba iha DNPKK nia lema katak “Di’ak-liu ita prevene duké ita kura”, tanba se la prevene no la kura mak ema barak nia fatin mak sei prizaun Becora ka Sua, iha ospitál ka Santa Cruz.
“Ha’u hakarak halo reflesaun tanba Suai ne’e hahú 1975-1999 istória boot ita-nia inan-aman sira luta ba rai ida-ne’e. Entaun iha konxiénsia katak rai ida-ne’e joven produtivu lori Suai di’ak no aat, iha ita-boot sira-nia liman,” nia hateten.
Tanba ne’e, husu ba jovem sira di’akliu-prevene duke kura, no mantein nafatin prinsípiu oinsá atu halo dezenvolvimentu.
“Ho nune’e, joven arte marsiál sira kria dame no estabilidade, hodi lori rai atu ba ne’ebè, ida-ne’e inan-aman ho avó mak rai-hela ba-ita no kumpre lei ne’ebè vigora ona,” nia dehan.
Reprezentante Administradór Munisípiu Covalima, Francisco de Jesus Alves, hateten joven sira tuir treinamentu arte marsiál la’ós treinu fíziku maibé bele promove pás.
“Ha’u husu ba alin sira atu kontinua treinu nafatin, treinu la’ós ba fíziku de’it maibé mós treinu ita-nia matenek no ita-nia hadomi malu, atu promove dame hodi prepara treinu formasaun matenek nian,” nia hateten.
Tanba, tuir nia, joven tuir treinu iha grupu arte marsiál ne’e la’ós sai ema-ne’ebè iha kotuk maibé tuir treinu arte marsiál nian ne’e atu treinu hanoin no matenek.
“Ha’u fiar ita-boot sira iha ne’e la’ós treinu de’it fiziku maibe partisipa mós iha formasaun oioin ne’ebè ita-boot sira preparadu, nune’e sai ema-ne’ebè iha valór iha ita-bo’ot sira-nia suku no aldeia. Ita-boot sira ho idade ne’ebè sei produtivu ho nune’e munisípiu Covalima presijz ita-boot sira-nia matenek,” nia dehan.
Jornalista : Celestina Teles
Editór : Cancio Ximenes
