DILI, 21 dezembru 2022 (TATOLI)— Polisia Nasionál Timor-Leste (PNTL), sei halo pasa revista ka operasaun ba veíkulu Estadu iha loron feriadu ba selebrasaun Santo Natál 2022 no Tinan Foun 2023.
Ekipa konjunta ne’e kompostu hosi PNTL, Komisaun Funsaun Públika (KFP), Komisaun Anti Korrupsaun (CAC, sigla portugés) no Diresaun Nasionál Transporte Terrestre (DNTT), hodi halo kontrolu ba sirkulasaun karreta no motór Estadu iha ámbitu selebarasaun Santo Natál no Tinan foun.
“PNTL sei halo operasaun ba transporte sira ne’ebe maka utiliza xapa mátrikula Estadu nian ne’ebé sirkula iha loron feriadu ka loron bo’ot”, Portavós Polisia Nasionál Timor-Leste (PNTL) Superintendente Xefe Polisia Arnaldo Araújo hateten ba jornalista sira liuhosi konferénsia imprensa ne’ebé maka halo iha Komandu Jerál PNTL, Caicoli, kuarta ne’e.
Iha operasaun ne’e, Portavós ne’e dehan deteta funsionáriu balun uza karreta no motór Estadu iha loron feriadu no laiha karta autorizasaun uzu hosi superiór mak sei hetan sansaun no apreensaun.
Iha biban hanesan, Xefe Departementu Tránzitu Seguransa Rodaviariu Nasionál, Assistenste Superintendente Polisia Albino Mouzinho, realsa katak iha feriadu ba Santo Natál no Tinan foun sei hala’o Check Point ba iha karreta veíkulu Estadu.
Operasaun ne’e ho baze ba despaisu hosi Primeiru Ministru, Taur Matan Ruak, ho objetivu atu halo kontrolu ba iha karreta Estadu labele halo sirkulasaun kuandu laiha nesesidade no laiha autorizasaun hosi superiór sira.
Bís Labele tula pasajeiru liu kapasidade
Entretantu, Asistente Superintendente Polisia, Albino Mouzinho, apela ba motorista sira liuliu ba bís sira atu tula pasajeiru iha tempu feriadu ba Natál no Tinan labele liu kapasidade karreta, hodi asegura ema iha viajen no prevene asidente trágefu.
Tuir lei kódigu estrada iha artigu 6 hosi númeru 6/2003, previstu katak motorista sira tula pasajeiru bainhira halo viajen ba iha fatin ida tenke tuir kapsidade karreta, kuandu la tuir konsidera komete infrasaun.
“Husu ba motorista sira tenke lori dokumentu komprovativu sira hanesan karta kondusaun no dokumetu sira seluk ne’ebé hakerek iha kódigu Estrada, nune’e bele halo viajen ho di’ak”, nia afirma.
Atu prevene asidente tráfegu,responsavél ne’e husu ba motorista sira atu labele konsumu tua, bainhira hala’o viajen.
Jornalista : Natalino Costa
Editór : Florencio Miranda Ximenes
