DILI, 21 dezembru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova dekretu-lei ne’ebé aprezenta hosi Ministru Finansa, Rui Augusto Gomes, kona-ba subsídiu alimentasaun ba traballadór sira ne’ebé ezerse sira-nia funsaun iha pontu integradu fronteira no alfándega nian.
“Ho konsiderasaun katak postu integradu sira iha períodu espesiál adapta ba nesesidade espesífika sira ne’ebé mosu bazeia ba funsaun no postu sira ne’e lokaliza iha zona dook hosi sentru urbanu sira, ho objetivu atu atribui subsídiu alimentasaun ne’ebé atu fó kompensasaun ba kondisaun espesiál serbisu traballadór sira, ne’ebé sai a’at liután bainhira kompara ho kondisaun ne’ebé maioria traballadór administrasaun públika hetan,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Governu aprova subsídiu diáriu alimentasaun ba ofisiál Servisu Migrasaun
Portavós Governu ne’e dehan, durante ne’e subsídiu hirak ne’e la’o hela, maibé implementa ho rezolusaun Governu, tanba ne’e Ministru Finansa hanoin katak presiza atu altera no iha baze legál forte liu, katak rezolusaun Governu la to’o tenke iha dekretu-lei hodi regulariza liután hodi implementa ho seguru medida ne’ebé mak durante ne’e implementa hela.
Jornalista : Antónia Gusmão
Editora : Julia Chatarina
