DILI, 21 dezembru 2022 (TATOLI)–Instituto Nasional de Formacão de Docentes e Profissionais da Educação de Timor-Leste (INFORDEPE) realiza ona formasaun kontinuasaun, akadémika no PRO-Português ba profesór timor-oan iha territóriu nasionál hamutuk 8.741.
Prezidente INFORDEPE, Manuel Gomes de Araújo, hateten, profesór hirak ne’e hetan ona formasaun iha área tolu espesífiku no tuir planu INFORDEPE molok mandatu ramata, profesór hamutuk 9.080 ne’ebé seidauk hetan oportunidade sei hetan hotu formasaun iha área oin-oin, nune’e profesór 17.821 iha territóriu nasionál bele hetan hotu formasaun.
“Formasaun ne’ebé la’o ona durante tinan-ida hetan ona partisipasaun másimu hosi profesór hosi nível ensinu baziku to’o ensinu sekundáriu, maibé barak hosi nível ensinu báziku. Hosi formasaun kontinuasaun, ami konsege realiza ona ba profesór 2.940 iha konteudu kurrikulár siénsia sosiál no siénsia ezata mak hanesan inglés no matemátika,” Manuel Gomes informa ba Agência Tatoli, iha ninia knaar fatin, INFORDEPE Balide, kuarta ne’e.
Notísia relevante: INFORDEPE no UNTL deside ona kalendáriu graduasaun estudante finalista 2.576
Tuir planu no programa ba tinan oin, INFORDEPE hakarak loke tan formasaun kontinuasaun ba profesór hamutuk 9.060, maibé depende ba orsamentu tanba daudaun la prevee orsamentu ba formasaun.
“Agora ba formasaun akadémika iha profesór hamutuk 2.576 maka hetan ona graduasaun ho grau akadémiku baxarelatu iha Universidade Nasionál Timor-Lorosa’e (UNTL). Formasaun akadémika hetan kooperasaun di’ak entre INFORDEPE ho UNTL, ne’ebé estudante sira hetan hotu fatin iha fakuldade Edukasaun Arte Umanidade (FEAH) nian,” nia akresenta.
Hosi totál númeru profesór baxarelatu hamutuk 2.576 ne’ebé hetan ona formasaun ne’e, sei iha mós profesór ne’ebé seidauk hetan formasaun akadémiku hamutuk 3.386 no seidauk hetan nível ho grau akadémiku baxarelatu. Enkuantu ba tinan oin INFORDEPE sei realiza tan formasaun akadémiku segunda faze ba profesór hamutuk 1.273.
“Profesór 3.386 ne’ebé seidauk hetan grau akadémiku baxarelatu, ita-nia planu ba tinan 2023 hakarak realiza tan formasaun akadémika ba na’in-1.275 maibé sei haree uluk akordu ho UNTL. Bainhira asina ona maka foin hatene loloos númeru ne’e mantein ka lae, atu nune’e sira bele tuir ona formasaun,” nia tenik.
Formasaun projetu PRO-Português iha profesór 3.225 maka tuir ona formasaun nível A2 no hosi totál númeru ne’e iha na’in-3.000 resin maka pasa ba B1. Formasaun ne’e sei kontinua filafali iha janeiru 2023 tanba agora eskola hotu feriadu. Formasaun ne’e rasik la’ós de’it iha área lian portugés maibé akumula área hanesan siénsia, prátika, didátika, pedagójika no abilidade profisionál.
“Bainhira formasaun PRO-Português ne’e laiha difikuldade ruma, ba tinan oin depende ba alvu INFORDEPE sei loke tan oportunidade ba profesór hamutuk na’in-5.375 iha formasaun B1 no B2. Enkuantu profesór sira ne’ebé hetan ona formasaun iha área tolu hanesan iha formasaun kontinuasaun, akadémiku no PRO-Português ne’e atinje númeru hamutuk 8.741,” Prezidente INFORDEPE dehan.
Jornalista : Tomé Amado
Editora : Julia Chatarina
