DILI, 21 dezembru 2022 (TATOLI)–Ministru Prezidénsia Konsellu Ministru (MPCM, sigla portugés), Fidelis Manuel Leite Magalhães, halo aprezentasaun ida iha ámbitu reuniaun Konsellu Ministru (KM), kuarta ne’e, kona-ba preparasaun Planu Lejislativu Governu ba tinan 2023.
“Maibé foin aprezenta de’it, deliberasaun no aprovasaun finál sei halo iha reuniaun Konsellu Ministru tuir mai tanba sei hela instituisaun 13,” Ministru informa hafoin reuniaun ezekutivu, iha Palásiu Governu.
Notísia relevante: Governu aprova planu lejizlativu Governu tinan 2022
Portavós Governu esplika, inisiativa ne’e hanesan esforsu Governu nian molok tinan foun, atu hahú planu lejizlativa sira ne’e fiksa ona, no mós bele fó biban ba Prezidénsia Konsellu Ministru atubele organiza servisu MPCM atubele koloka apoiu tékniku jurídiku nesesáriu sira ba prioridade sira ne’ebé identifika ona, hodi nune’e bele aselera lalais prosesu sira ba produsaun normál no lejizlasaun sira.
Enkuantu, iha tinan 2022, KM aprova lejizlativa hamutuk 270, nune’e tinan ne’e ramata bele atinje to’o 280.
“Kuaze loron-loron Governu prodús inisiativa no diploma sira. Espera katak iha tinan 2023 ritmu velosidade bele aumenta no planeamentu boot liu, la’ós númeru de’it mak aumenta maibé kualidade mós di’ak liután,” nia tenik.
Jornalista : Antónia Gusmão
Editora : Julia Chatarina
