DILI, 21 dezembru 2022 (TATOLI)—Sekretaria Estadu Formasaun Profisionál no Empregu (SEFOPE) liuhosi Sentru Informasaun Merkadu Traballu, públika relatóriu rezultadu Peskiza Empreza no Abilidade (PEA) 2022 iha Timor-Leste ba públiku.
“Objetivu PEA atu esplora abilidade no demanda empreza sira iha Timor-Leste. Bazeia ba rezultadu peskiza, tuir dadus rekrutamentu a’as iha tinan 2022 mak hanesan traballadór limpeza, asistente vendedór loja, waitress ka hein na’in, peskizadór no traballador enjiñaria,” refere nota ne’ebé Agência Tatoli asesu, kuarta ne’e.
Aleinde ne’e, kona-ba lakuna abilidade ne’ebé relata hosi empreza sira mak hanesan asistente vendedór loja, enjiñeiru sivil, halo dose, traballadór konstrusaun uma, kaseiru, karpinteiru, reparadór no instaladór ba elétrika no resepsionista.
Nune’e, rezultadu peskiza hatudu katak iha okupasaun lima mak susar atu rekruta hanesan enjiñeiru sivil, kontadór, kaseiru, profisionál públikasaun merkadoria no tein na’in.
Notísia relevante : SEFOPE asina karta aseitasaun ho traballadór na’in-107 bá servisu iha Austrália
Ikus liu, rezultadu peskiza ne’e hatudu mós katak, 86% empreza iha Timor-Leste nunka públika sira-nia vaga.
Hatudu mós dadus importante ne’ebé bele fó referénsia ba formadór sira iha Sentru Formasaun, Eskola Tékniku Vokasionál no Universidade sira atu konsidera dadus sira hanesan vaga susar atu rekruta, rekrutamentu, lakuna abilidade, saláriu médiu, traballadór estranjeiru, meiu publikasaun vaga no rekrutamentu iha futuru.
Peskiza empreza no abilidade ba tinan 2022 ne’e rasik, hetan suporta tékniku no finansa hosi Paseria Ba Prosperidade Inkluzivu (PROSIVU) ne’ebé hanesan programa hosi Department of Foreign Affairs and Trade (DFAT) no International Labour Organization (ILO), ne’ebé PROSIVU aloka ninia asesór hodi fó apoiu tékniku ba implementasaun peskiza.
ILO mós fó apoiu orsamentu ba atividade peskiza iha terrenu durante fulan-rua iha munisípiu 13.
Jornalista : Arminda Fonseca
Editora : Julia Chatarina
