Lejislativa limitasaun idade reforma hein promulgasaun
DILI, 22 deze,mbru 2022 (TATOLI)—Prezidente komisaun A trata asuntu Justisa no Konstituisional, Joaquim dos Santos, informa lejislativa limitasaun idade reforma hein promulgasaun hosi Prezidente Repúblika (PR).
Notísia Relevante: Komisaun A submete paresér lejislativa limitasaun idade reforma ba funsionáriu públiku
Loron hirak liu ba reuniaun plenária aprova ona finál globál proposta lei númeru 43/V(4a)-autorizasaun lejislativa iha matéira fixasaun limite idade relasaun serbisu ba funsionáriu públiku (FP) no ajente administrasaun públika.
“Lei ne’e hein promulgasaun hosi Prezidente Repúblika. No lei ne’e promulga tiha hafoin Governu durante prazu loron 80 sei hasai lei kódiku reforma iha ne’eba mak haree idade reforma obrigatóriu ho idade 60,” Prezidente komisaun A ne’e hateten ba Agéncia TATOLI, kinta ne’e.
Nia hateten, ida-ne’e obrigatóriu funsionáriu reforma ho idade 60 tenke hatama rekerimentu ba reforma hodi fó fali fatin ba ema sira seluk servisu.
Antes ne’e, Prezidente Komisaun Funsaun Públika (KFP), Faustino Cardoso, hateten proposta lei autorizasaun lejislativa atu hodi define idade másimu serbisu efetivu iha funsaun públika.
“Inisiativa ne’e Governu hato’o proposta-lei husu autorizasaun hosi PN bainhira hetan ona autorizasaun mak Governu bele avansa liuhosi instrumentu legál apropriadu kontextu Governu nia mak dekretu lei ne’e atu hodi define limite idade másimu serbisu efetivu iha funsaun públika,” nia hateten.
Nia hatutan, pedidu autorizasaun lejislativa mai iha PN tanba definisaun idade limite servisu efetivu ne’e liga ho direitu umanu no limitasaun direitu ema ida-nian.
Tuir proposta Governu nian atu define FP ho idade 60 presiza reforma ona ho obrigatóriu.
“Diskusaun nivél iha komisaun liu-liu ko’alia haree kona-ba periodu exepsionalidade ba sira ne’ebé idade 60 ne’e obrigatóriu tenke hato’o ona rekerimentu ba reforma. Hodi nune’e fó fali espasu tempu ba joven sira tanba populasaun dominante besik 70% joven ho idade 30 mai kraik,” nia esplika.
“Ita hakarak juveniliza funsaun públika halo sai joven liután hasa’e produtividade serbisu, signifika ita tenke loke odamatan,” nia dehan.
Tuir dadus hosi KFP daudaun ne’e rejista funsionáriu públiku ho idade reforma 60 ba leten hamutuk 3441, númeru ne’e 60% hanesan profesór ka manorin sira hosi Ministéiru Edukasaun Juventude Desportu (MEJD).
Jornalista : Nelson de Sousa
Editór : Cancio Ximenes
