iklan

DILI, POLÍTIKA

Komisaun A submete paresér lejislativa limitasaun idade reforma ba funsionáriu públiku

Komisaun A submete paresér lejislativa limitasaun idade reforma ba funsionáriu públiku

Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 04 novembru 2022 (TATOLI)—Komisaun A trata asuntu Justisa no Konstituisional iha Parlamentu Nasionál (PN), submete ona relatóriu no paresér kona-ba proposta-lei númeru 43/V(4a)-autorizasaun lejislativa iha matéira fixasaun limite idade relasaun serbisu ba funsionáriu públiku (FP) no ajente administrasaun públika.

Notísia Relevante: Komisaun A ho Governu hahú diskute lejislativa limitasaun idade reforma

“Ami haruka tiha ona relatóriu no paresér ba meza Parlamentu Nasionál mai sei ajenda ba autorizasaun lejislativa ne’e,” Prezidente Komisaun A, Joaquim dos Santos ‘Boraluli’, informa ba Agéncia Tatoli, sesta ne’e.

Nia konsidera, autorizasaun lejislativa ne’e importante tebes ne’ebé tinan barak ona ko’alia kona-ba idade reforma, nune’e komisaun hala’o ona audiénsia públika ho Governu no entidade seluk hodi prodús relatóriu no paresér hodi submete ona ba meza PN bele kontinua diskusaun iha plenária, nune’e agora hein de’it ajenda.

Antes ne’e, Prezidente Komisaun Funsaun Públika (KFP), Faustino Cardoso, hateten proposta-lei autorizasaun lejislativa atu hodi define idade másimu serbisu efetivu iha funsaun públika.

“Inisiativa ne’e Governu hato’o proposta-lei husu autorizasaun hosi PN bainhira hetan ona autorizasaun mak Governu bele avansa liu hosi instrumentu legál apropriadu kontestu Governu nia mak dekretu-lei ne’e atu hodi define limite idade másimu serbisu efetivu iha funsaun públika,” nia hateten.

Nia hatutan, pedidu autorizasaun lejislativa mai iha PN tanba definisaun idade limite serbisu efetivu ne’e liga ho direitu umanu no limitasaun direitu ema ida-nian, no tuir proposta Governu nian atu define FP ho idade 60 presiza reforma ona ho obrigatóriu.

“Diskusaun nivél iha komisaun liu-liu ko’alia haree kona-ba  períodu exepsionalidade ba sira-ne’ebé idade 60 ne’e obrigatóriu tenke hato’o ona rekerimentu ba reforma,” nia esplika.

Nune’e, nia dehan, fó fali espasu tempu ba joven sira tanba populasaun dominante besik 70% joven ho idade 30 mai kraik tanba hakarak juveniliza funsaun públika.

“Ita hakarak juveniliza funsaun públika halo sai joven liután hasa’e produtividade serbisu signifika ita tenke loke odamatan,” nia hateten.

Tuir dadus hosi KFP daudaun ne’e rejista funsionáriu públiku ho idade reforma 60 ba leten hamutuk 3441, númeru ne’e 60% hanesan profesór ka manorin na’in sira hosi Ministériu Edukasaun Juventude Desportu (MEJD).

Entertantu, antes ne’e ba autorizasaun lejislativa ne’e komisaun A hala’o ona audiénsia públika ho entidade relevante sira hanesan Prezidénsia Konsellu Ministru (PCM, siglá portugés) ho Komisaun Funsaun Públika (KFP).

Notísia Relevante: PN baixa lejislativa limitasaun idade reformadu FP ba komisaun A

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!