DILI, 23 dezembru 2022 (TATOLI)–Diresaun Nasionál Asaun Sosiál Eskolár (DNASE) ne’ebé trata asuntu Sanitária hosi Ministériu Edukasaun Juventude no Desportu (MEJD), iha orsamentu $100.000 resin ba tinan ida hodi implementa programa prioridade sira.
Diretór Nasionál Asaun Sosiál Eskolár, Joaquim Martins, relata, programa prioridade sira ne’ebé diresaun prevee no implementa iha tinan ne’e maka hanesan programa orta pedagójika (to’os eskolár) merenda eskolár, apoiu materiál emerjénsia no saúde eskolár.
“Programa sira ne’e ita implementa ona no hetan apoiu hosi fundu $100.000 resin, tanba ne’e ha’u husu ba eskola sira atu nafatin implementa programa, nune’e bainhira ita halo avaliasaun karik bele hatudu rezultadu di’ak ba eskola no estudante sira,” Diretór informa ba Agência Tatoli, iha ninia knaar fatin, MEJD, Vila Verde, sesta ne’e.
Notísia relevante: Akordu tripartidu atu fasilita kooperasaun programa merenda eskolár
MEJD implementa ona programa orta pedagójika ne’e iha munisípiu lima hanesan Liquiçá, Aileu, Manufahi, Ermera no Ainaru, ne’ebé programa ne’e hahú hosi nível ensinu báziku sentrál no sei abranje ba eskola filiál sira.
Programa orta pedagójika importante atu implementa iha eskola sira atubele apoiu eskola sira iha territóriu nasionál.
“Nune’e bele ajuda alunu sira koñese di’ak liután ai-han sira ne’ebé konsidera fresku atu konsumu. Ita hakarak programa sira bele implementa iha eskola hotu tanba ita hakarak sai hanesan siénsia ida ba alunu sira atu sai matéria prátika ida ba sira iha aula laran nu’udar laboratóriu ida hodi bele introdús matéria biolojia no matemátika,” nia tenik.
Enkuantu, kona-ba programa merenda eskolár, diresaun sei foku liu ba munitorizasaun no implementasaun tanba iha ona dekretu-lei númeru 3/2016 ne’ebé atribui ona kompeténsia ba Ministériu Administrasaun Estatál (MAE) maka sei prevee orsamentu ba merenda eskolár, maibé atu garante monitorizasaun no avaliasaun programa ne’e atu la’o di’ak maka sei nafatin sei asume hosi DNASE hodi prepara kalendáriu implementasaun iha loron efetivu ba eskola sira.
Orsamentu ne’ebé DNASE prevee ba programa prioridade sira ne’e sei utiliza hodi apoiu materiál emerjénsia ba eskola sira ne’ebé maka afetadu ba dezastre naturál inklui apoiu programa saúde eskolár ne’ebé instala ona iha eskola sira.
Jornalista : Tomé Amado
Editora : Julia Chatarina
