DILI, 27 dezembru 2022 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT), tersa ne’e, ofisialmente halo abertura ba mikrolete diresaun foun.
“Ohin ita halo lansamentu ba transporte mikrolete 013 ne’ebé sei halo movimentu iha kapitál Dili, ho objetivu atu fasilita populasaun sira ne’ebé durante ne’e hela dook no seidauk asesu ba transporte públiku, nune’e ho prezensa diresaun foun bele ajuda sira,” Ministru Transporte no Komunikasaun, José Agustinho da Silva, hateten durante serimónia abertura iha DNTT, Balide.
Mikrolete diresaun 013 ne’e halo atividade iha Dili, ho ninia rute hahú hosi Kasnafar, tun bá mota ponte 3, hosi ne’e tun mai tasi-ibun otél Arbiru, no tesik sa’e fali bá Pertamina Indonézia.
Hafoin sa’e fali bá Institute of Bussiness (IOB) antigu, tesik fali iha Komité Sentrál FRETILIN (CCF, sigla portugés) nia oin, hosi ne’e sa’e fali obralan Aimutin no bá fali Dili Institute of Technology (DIT), tesik fali ba merkadu Manleuna, hosi ne’e bá fali Lisbutak no tama fali bá ponte 3, nune’e mikrolete 013 nia área kobre kilómetru 20.
Notísia relevante: MTK halo abertura ba mikrolete diresaun 013 iha 27 dezembru
Ministru dehan, planu diresaun ne’e la’o ona desde tinan-rua ba kotuk no DNTT koordena ho Polísia Nasionál Timor-Leste, liuliu parte munisípiu Dili parte Tránzitu nian hodi halo lansamentu.
“Pedidu mikrolete nian barak mak tama, besik 200, maibé ohin mikrolete sira ne’ebé mai partisipa abertura ne’e hamutuk 10 resin no totál mikrolete hamutuk 50 resin mak sei halo movimentu,” nia akresenta.
Tarifa ba mikrolete diresaun 013 sei nafatin tarifa ne’ebé iha, ba estudante 15 cent no ba ema la’ós estudante $0,25.
Iha abertura ne’e, motorista mikrolete sira sente kontente tanba konsidera inisiativa ne’e hanesan pasu di’ak ba abitante sira ne’ebé durante ne’e hein hela mikrolete diresaun 013.
Hafoin halo lansamentu, kada motorista simu lisensa hodi halo ona operasaun iha kapitál Dili.
Jornalista : Arminda Fonseca
Editora : Julia Chatarina
