DILI, 21 dezembru 2022 (TATOLI)—Xefe Departamentu Rejistu Veikulu iha Dirasaun Nasionál Transporte no Terrestre (DNTT), Amandio do Rosário, informa iha loron 27 dezembru tinan ne’e, Ministru Transporte no Komunikasaun (MTK), José Agostinho da Silva, sei halo abertura ba mikrolete diresaun 013 hodi bele hala’o ona operasaun iha kapitál Dili.
Notísia Relevante: Fulan ne’e, MTK halo abertura ba mikrolete diresaun 013
“Prosesu kona-ba mikrolete diresaun 013 kleur ona no ema hein, maibé prosesu ne’e la’o to’o desizaun ministru iha ona no Jornál Repúblika mós fó sai ona. Ne’ebé, nia data fiksu iha 27 dezembru, ita halo ona abertura. Ida-ne’e ministru mak direta halo abertura,” Amandio do Rosário hateten ba Agência Tatoli iha nia kna’ar fatin, Dili, kuarta ne’e.
Nia esplika, prosesu abertura agora daudaun téknikamente preparadu ona no hein mikrolete diresaun 013 atu mai simu ida-ida nia lisensa iha 27 dezembru.
“Agora daudaun preparasaun teknikamente lisensa sira preparadu no kontratu públiku prepara ona, nune’e iha 27 dezembru mikrolete sira mai partisipa ba lansamentu ne’e. Nune’e, sira ida-idak simu nia lisensa hodi halo rotasaun halai tuir nia diresaun ne’ebé ita estabelese ona,” nia dehan.
Ninia prosesu ne’e, Diresaun Nasionál Transporte no Telekomunikasaun, liuhosi Departamentu Rejistu Veikulu pasa ona informasaun ba motarista mikrolete hamutuk 10 ka 15 atu iha loron 27 dezembru mai partisipa.
“En nome sira hotu, hosi mikrolete 10 ka 15 ne’e mai reprezenta sira hotu, depois halo abertura sira ida-idak mai simu nia lisensa, nune’e sira bele ba halo ona nia operasaun,” nia hateten.
Iha abertura ne’e, motorista mikrolete sira sente kontente tanba ne’e hanesan pasu ida di’ak ba abitante sira-ne’ebé durante hein hela mikrolete ba diresaun ne’e.
“Iha prosesu abertura ba diresaun 013 ne’e bele responde ona ba populasaun sira-ne’ebé iha área diresaun ne’e. Aleinde ne’e, bele tula sira-nia produtu ba merkadu, tanba diresaun ne’e mós sei tama iha merkadu Manleuana,” nia dehan.
Jornalista : Nelia Fernandes
Editór : Cancio Ximenes
