iklan

NASIONÁL, KAPITÁL

Fulan ne’e, MTK halo abertura ba mikrolete diresaun 013

Fulan ne’e, MTK halo abertura ba mikrolete diresaun 013

Xefe Departamentu Rejistu Veikulu DNTT, Amandiu do Rosário. Imajen Tatoli/Nelia Fernandes

DILI, 04 outubru 2022 (TATOLI)-Xefe Departamentu Rejistu Veikulu iha Dirasaun Nasionál Transporte no Terrestre (DNTT), Amandiu do Rosário, informa, iha fulan outubru tinan ne’e, Ministru Transporte no Komunikasaun (MTK), José Agostinho da Silva, sei halo abertura ba mikrolete diresaun 013.

“Karreta (mikrolete) diresaun 013, agora dadaun kliente ka na’in ba karreta ne’e iha ona faze preparasaun, signifika karreta sira ne’e dadaun sira (nain ba karreta) pinta hotu ona no ami fornese ona plát ba transporte públiku 013, ida ne’e dahuluk. Ba daruak, iha fulan ne’e nia laran, Ministru (MTK) sei loke abertura ba diresaun 013,” Amandiu do Rosário, hateten ba jornalista sira, iha nia knaar fatin, Balide, Díli, tersa ne’e.

Tuir nia, Diresaun Transporte, liuhosi Seksaun Transporte Públiku, agora dadaun atinji ona mikrolete ne’ebé atu halo operasaun ba diresaun 013 liu ona 20.

“Ida ne’e preparasaun dokumentu kompletu ona, hosi sira ne’e hotu hein Ministru (MTK) mai, ita halo abertura, ida ne’e mak etapa dahuluk. Maibé, balun sei la’o hela prosesu pinta tanba iha problema ekonomia liliu ba orsamentu, entaun balun sei adia fali ba loron seluk. Tanba ne’e, mak primeira faze ami sei koloka 30 resin. Nune’e, ami sei hein Ministru fila mai parese iha 14 ba leten ida ne’e, ita halo ona abertura ba diresaun 013,” nia esplika.

Maske nune’e, nia akresenta, Ministru Transporte no Komunikasaun (MTK), José Agostinho da Silva dadaun ne’e halo hela vizita ba nasaun Europa, tanba ne’e, DNTT hein Ministru mai hodi halo abertura ba diresaun mikrolete 013.

“Se Diresaun Transporte de’it, ohin ha’u asina ona lisensa, ita bele halai ona, maibé, ida ne’e tenke hein Ministru mak halo abertura. Tanba ne’e, iha semana ida mai tan, ohin iha ona 04 outubru, maizumenus iha 15 ba leten, ita bele loke ona, ne’ebé iha fulan ne’e jalur (diresaun) 013 tenke halo operasaun ona,” nia dehan.

Hosi prosesu ne’e hotu, tuir alvu DNTT ba mikrolete diresaun 013 ne’ebé halo operasaun iha kapitál dili, hamutuk 70.

“Maibé, ita haree situasaun sei bele aumenta ka lae, se aumenta ita bele aumenta. Ne’ebé, ita fornese ona nomor (70) ne’ebé ha’u temi ba ona komunidade sira, sei presiza aumenta ita aumenta, tanba nesesidade ne’e sei iha,” Xefe Departamentu Rejistu Veikulu ne’e katak.

Iha biban ne’e, nia aumenta, mikrolete diresaun 013 ne’ebé sei halo operasaun iha kapitál Dili, komunidade sira sei selu tuir regras ne’ebé daudaun iha.

“Pasajeirus sira selu (mikrolete 013) ne’e tuir regras ne’ebé iha, ema eskola oan sira baibain selu 15 cent, ne’ebé ita la’o tuir nafatin no ita hakruk ba tarefa ne’ebé estabelese ona,” nia akresenta.

Hosi ne’e, Xefe ne’e mós esplika, diresaun mikrolete 013 ne’ebé sei halo atividade iha kapitál Dili hahú hosi Kasnafar, tuun mai mota ponte 3, hosi ne’e tun mai Hotel Arbiru.

“Nune’e, tesik mai sa’e fali ba Pertamina Indonézia, nune’e sa’e fali IOB antigu, depois tesik mai fali iha CCF nia oin, hosi ne’e sa’e fali Obralan Aimutin ba fali DIT, tesik fali ba Merkadu Manleuna, hosi ne’e ba fali Lisbutak tama fali ba ponte 3, ida ne’e karreta 013 nia área mak ida ne’e, bele dehan hamutuk 20 kilometru,” nia dehan.

Tanba ne’e, nia apela ba komunidade sira ne’ebé hela iha área ba diresaun mikrolete 013 atu hein iha fulan ne’e, mikrolete ne’e halo operasaun ona.

“Agora dadaun karreta kinur sira iha dala-dalan komesa la’o ona, tanba sira mai iha DNTT atu selu. Selu tiha, troka plat, sira ba tékniku halo inspesaun. Hosi rezultadu inspesaun ne’e mak ita hein para ita fornese lisensa ba sira, nune’e bainhira Ministru mai fahe ba sira ita la’o dadaun ona,” nia afirma.

Entretantu, tuir informasaun hosi Xefe Departamentu Registu Veikulu iha Dirasaun Nasionál Transporte no Terrestre (DNTT), Amandiu do Rosário, katak mikrolete diresaun 013 ne’ebé sei halo operasaun iha kapitál Dili ho koor kinur.

Jornalista : Nelia Fernandes
Editór : Rafy Belo

iklan
iklan

Leave a Reply

iklan
error: Content is protected !!