BOBONARO, 28 dezembru 2022 (TATOLI)-Filomeno Lesu, aman hosi Cristiano Emanuel da Costa, tinan 16 ne’ebé sofre nehan musan-rua hosi parte leten monu, keixa ona membru polísia nain tolu ba Provedor Direitu Ema-nian no Justisa (PDHJ, sigla portugés) delegasaun territoriál Maliana.
“Tuku 19:00 ho balun hanesan ne’e, enfermeiru hosi ospitál mak telefone ha’u dehan katak ita-nia oan balu agora iha hela ospitál, polísia sira balu mak lori mai, dehan monu maibé ami mós to’o mai iha ospitál, labarik dezmaia hela ho kondisaun lanu todan”, Filomeno informa ba jornalista sira iha ospitál Maliana, kuarta ne’e.
Filomeno lamenta ho informasaun hosi membru polísia ne’ebé dehan Cristiano monu. “Monu saida mak labarik nia ibun fera hotu, nehan mós monu depois matan fukun metan”, katak nia.
Nia hatutan tan: “Ami família la satisifas, ami hakarak buka prosesu ida ne’ebé mak legál liuhosi justisa, ohin ami to’o ona ba PDHJ, ami deklara ona buat balun atu ami família mós satisfas ho atuasaun no agresaun hosi oknum polísia ka sira parte seguransa mak atu bele atua situasaun iha terrenu, la’ós atua ho pásiva maibé sira atua fali ho agresaun fizika”.
Notísia relevante:PNTL Bobonaro sei kontrola joven hemu lanu iha prezépiu oin
Hatán konabá problema ne’e, Segundu Komandante Polísia Munisípiu Bobonaro, Asistente Superintendente, Fasío de Jesus Lima, hateten to’o agora komandu seidauk simu keixa ruma ho parte ne’ebé sente sai vítima, tanba ne’e seidauk bele fó sai deklarasaun sé mak sai suspeitu no vítima.
“Ha’u husu ba sira ne’ebé sente sai vítima ba atuasaun polísia, bele hato’o keixa ba polísia ka Ministériu Públiku no fatin ne’ebé de’it atu ita bele buka lia-loos ba akontesimentu ne’e, tanba polísia nia medidas ida mak prevensaun atu asegura estabilidade iha ita-nia munisípiu hodi fó fatin hakmatek ba ema atu deskansa ho kontente”, katak Komandante Fásio.
Sorin seluk, Médiku Jerál Sala Emerjensia ospitál Referál Maliana, Jaime Gomes, esplika kondisaun jerál pasiente ne’e di’ak hela, tanba bainhira médiku sira halo atendimentu Cristiano ko’alia ho normál.
Maibé dotór espesialista dermatolojia rekomenda presiza transporta bá ospitál Nasionál Guido Valadares (HNGV, sigla portugés) Dili, tanba pasiente hetan pankada maka’as hosi ibun, kotuk no matan fukun.
“Ohin ami sei halo transportasaun bá Dili ho razaun katak tenke iha tratamentu kontinua, tanba ita-nia ekipamentu laiha, iha HNGV mak iha, entaun ita haruka bá halo Raio-X ida ne’ebé espesífiku iha ibun laran, keta halo la’ós nia nehan de’it mak monu maibé nia zengivél ida ne’ebé hodi kaer nehan tohar hotu, bá Dili atu espesialista sira iha ne’ebá kontinua mellora tratamentu”, esplika.
Entertantu, parte família keixa ona ba PDHJ delegasaun teritoriál Maliana no halo ona observasaun iha terrenu.
Família diskunfia Cristiano nian nehan ne’ebé monu tanba hetan baku hosi membru polísia munisípiu Bobonaru nain tolu iha bairru Pemancar, aldeia Achu-Laca, suku Lahomea, postu administrativu Maliana.
Notísia Relevante:PNTL Bobonaro sei kontrola fogete iha loja no merkadu
Jornalista : Sérgio da Cruz
Editór : Zezito Silva
