Governu iha ona planu lejizlativu hamutuk 205 ba tinan 2023
DILI, 28 dezembru 2022 (TATOLI)—Ministru Prezidénsia Konsellu Ministru, Fidelis Manuel Leite Magalhães, aprezenta planu lejizlativu hamutuk 205 ba tinan 2023, iha reuniaun Konsellu Ministru (KM), kuarta ne’e, ne’ebé hetan ona aprovasaun.
“Ohin Konsellu Ministru aprova ona planu lejizlativu Governu ba tinan 2023, entaun loron 02 janeiru 2023, ami sei print planu lejizlativu ne’e no sei divulga ba públiku hodi bele hatene planu saida mak Governu iha atu kria lei no inisiativa lejizlativa sira durante tinan 2023,” Ministru Fidelis, relata hafoin reuniaun ezekutivu ba dala-ikus nian ba tinan 2022, ne’ebé prezide hosi Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, iha Palásiu Governu.
Notísia relevante: MPCM halo aprezentasaun planu lejizlativu Governu ba tinan 2023
Planu lejizlativu ne’e elabora ona bazeia ba proposta ne’ebé submete hosi membru KM sira no konsiste previzaun intervensaun lejizlativa Governu nian no respetiva prioridade, ne’ebé fahe ba setór sira ba tinan 2023.
Planu lejizlativu ba tinan 2023 iha nível dezenvolvimentu kapitál sosiál prevee intervensaun lejizlativa 31, dezenvolvimentu infraestrutura sira ho kálkulu totál intervensaun lejizlativa 27, iha dezenvolvimentu ekonómiku aprezenta intervensaun lejizlativa 33, iha área konsolidasaun governativa prevee intervensaun lejizlativa 35 no nível governasaun di’ak no kombate korrupsaun ho kálkulu totál inisiativa lejizlativa hamutuk 79.
Planeamentu lejizlativu nu’udar instrumentu ne’ebé konsagra ona iha polítika reforma lejizlativa hodi hadi’a kualidade atividade lejizlativa Governu nian.
Jornalista : Arminda Fonseca
Edirora : Julia Chatarina
