DILI, 29 dezembru 2022 (TATOLI)—Ministériu Edukasaun Juventude no Desportu (MEJD) identifika ona estudante 500 hosi munisípiu Liquiçá sai nu’udar mellór klasifikadu atu hetan bolsa méritu.
Diretór Servisu Edukasaun munisípiu Liquiçá, Carlos Lopes, relata, estudante sira ne’e kompostu hosi nível ensinu báziku to’o ensinu sekundáriu jerál no tékniku vokasionál.
“Ita iha estudante hamutuk 550 maka tama primeiru to’o kintu klasifikadu. Estudante sira hosi kuatru ano, sestu ano inklui désimu primeiru ano,” Diretór informa ba Agência Tatoli, iha Salaun Ian Martin, Instituto Nacional de Formação de Docentes e Profissionais da Educação de Timor-Leste (INFOREPE) Balide kinta ne’e.
Notísia relevante: Estudante finalista 2.942 iha Liquiçá sei partisipa ezame nasionál
Nia dehan, dadus estudante mellór klasifikadu ne’ebé públika hosi estudante pasajen klase nian, enkuantu daudaun ba estudante ne’ebé partisipa ezame nasionál (finalista) no sai mellór klasifikadu sei deside hosi unidade kurríkulu nasionál parte administrasaun eskolár.
“Ami-nia kbiit naton de’it iha nível munisipál hosi pasajen klase ou pasajen siklu,” nia akresenta.
Hosi prosesu tomak ne’ebé MEJD hatún ona liuhosi orientasaun hosi Diretór Jerál Edukasaun Ensinu katak labarik sira ne’ebé tama ona iha lista mellór klasifikadu tenke ba trata konta bankária iha banku Banku Nasionál Komérsiu Timor-Leste (BNCTL, sigla portugés).
“Ba labarik sira ne’ebé idade seidauk to’o atu trata kartaun eleitorál, hetan ona konfirmasaun hosi Diretór Jerál Edukasaun Ensinu ministériu no BNCTL hodi utiliza hela kartaun eleitorál hosi inan aman ,” nia tenik.
Nune’e mós, labarik sira ne’ebé tama iha mellór klasifikadu la’ós asembleia ba profesór de’it maibé liuhosi verifikasaun nível eskolár iha nível sentrál, hafoin hetan avaliasaun to’o iha Diretór Edukasaun no Superintendente atu nune’e labele hamosu nepotizmu iha desizaun sira.
“Ami hamutuk ho Diretór Jerál no Superintendente sira tuur hamutuk hodi halo filafali verifikasaun ho didi’ak no loloos, nune’e iha futuru mai labele mosu problema entre eskola ho edukasaun,” Diretór salienta.
MEJD prevee orsamentu atu apoiu subsídiu bolsa méritu ba estudante mellór klasifikadu iha territóriu nasionál hamutuk millaun $7,2, maibé ba munisípiu Liquiçá rasik seidauk hatene orsamentu hira mak aloka ba konta bankária estudante 550 ne’ebé sai mellór klasifikadu.
Jornalista : Tomé Amado
Editora : Julia Chatarina
