DILI, 29 dezembru 2022 (TATOLI)–Diretór Servisu Edukasaun Munisípiu Liquiçá, Carlos Lopes, relata projetu komunitáriu 11 daudaun enfrenta hela problema tanba mudansa klimátika, nune’e halo transporte sira labele lori materiál ba eskola sira hodi hala’o prosesu reabilitasaun.
“Ita iha projetu komunitáriu 11 tama ona iha pagamentu segundu faze, maibé projetu sira foin maka atinje 40% resin tanba razaun mudansa klimátika ne’ebé difikulta transporte sira transporta materiál ba eskola atu hala’o prosesu reabilitasaun,” Diretór inform aba Agência Tatoli, iha salaun Ian Martin, Instituto Nacional de Formação de Docentes e Profissionais da Educação de Timor-Leste (INFORDEPE) Balide, kinta ne’e.
Notísia relevante: Progresu projetu komunitáriu eskola Laen Tolu atinje ona 60%
Tuir Responsável, maski iha dalan barak estraga no kotu, maibé Ministériu Edukasaun Munisipál sei kontinua servisu hamutuk ho tékniku sira inklui grupu projetu komunitáriu atu buka nafatin meiu hodi rezolve kestaun sira, tanba ne’e hanesan alvu ida atubele finaliza iha mandatu ne’e.
“Ita kontinua nafatin esforsa maski ita labele kontra mudansa klimátika ne’ebé akontese daudaun, maibé kuandu iha oportunidade atu avansa maka ita sei halo esforsu atubele ultrapasa situasaun sira hodi tulun grupu komunitáriu sira bele transporta lalais materiál to’o eskola sira,” nia tenik.
Munisípiu Liquiçá iha projetu komunitáriu hamutuk 15, projetu rua mak tama ona prosesu konkursu públiku, agora ida atinje ona 80% no ida seluk foin 50%.
Projetu rua kompostu hosi eskola ensinu sekundáriu jerál no ensinu sekundáriu no tékniku vokasionál Leorema, enkuantu entre projetu komunitáriu 13, projetu rua atinje ona 100% no hela projetu 11 maka sei iha hela faze reabilitasaun.
Jornalista : Tomé Amado
Editora : Julia Chatarina
