DILI, 29 dezembru 2022 (TATOLI)—Xefe Departamentu Dezenvolvimentu Turístiku iha Ministériu Turizmu Komérsiu no Indústria (MTKI), Arnaldo Freitas, hateten, reabilitasaun uma gazebo inklui item seluk hanesan hadi’a haris-fatin, trotoár, tuur fatin no lampu iha Areia Branca sei finaliza iha 2023.
“Projetu hadi’a uma gazebo iha Areia Branca tuir polítika VIII Governu 2022 la prevee iha orsamentu atu halo reabilitasaun tanba área ne’e ninia kompeténsia ba munisípiu Dili, maibé tanba hetan krítika hosi públiku entaun Ministériu Turizmu Komérsiu no Indústria foti osan hosi manutensaun sítiu sira hodi halo reabilitasaun,” Arnaldo Freitas, informa ba Agência Tatoli iha Farol, kinta ne’e.
Notísia relevante: Empreza Suai Indah hahú hadi’a uma gazebo iha Areia Branca
Tuir prosesu, empreza Suai Indah mak halo manutensaun ba trotáor a’at, lampu, haris-fatin, tuur fatin inklui gazebo, ne’ebé tuir planu atu ramata iha tinan ne’e maibé tanba momentu prosesu konkursu públiku ne’e iha tempu badak nia laran, entaun daudaun ne’e empreza seidauk bele finaliza iha tinan ne’e.
“Daudaun ne’e empreza foku uluk hadi’a trotoár, lampu, no haris-fatin ba gazebo ne’e rasik, ninia serbisu ne’e todan tanba presiza materiál lokál, entaun tinan ne’e la konsege implementa muda fali ba tinan oin. Ita prevee fali orsamentu hodi hadi’a gazebo, ne’ebé tinan 2023 osan tama sedu ita sei finaliza iha fulan-abril,” nia akresenta.
Nia dehan, item tolu seluk ne’ebé daudaun empreza hadi’a hanesan trotoar, lampu, tuur fatin no haris-fatin nia orsamentu hamutuk $50.000, ho ninia progresu atinje ona 50% no sei finaliza iha tinan 2023.
Nune’e, iha gazebo neen mak sei hadi’a iha tinan 2023 maibé iha planu sei harii tan gazebo foun balun.
Jornalista : Arminda Fonseca
Editora : Julia Chatarina
