DILI, 29 dezembru 2022 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) ezekuta ona Orsamentu Jerál Estadu (OJE) 2022 ho montante $2.247.080,79 (95%) hosi totál orsamentu alokadu $2.537.259.
“Ita ezekuta ona orsamentu ba SERVE, I.P 95% ekivalente $2.247.080,79, hahú hosi janeiru to’o 27 dezembru 2022,” Supervizora Seniór iha SERVE, I.P, Ana Jeánnie Côrte-Real, informa ba Agência Tatoli, iha ninia knaar fatin, Hudi-laran, kinta ne’e.
Notísia relevante: SERVE, I.P sei harii edifísiu andar ualu iha tinan 2025
Orsamentu $2.537.259 kompostu hosi kompromisu $93.592,79, obrigasaun $184.997,10 despeza reál $2.247.080,60, saldo $11.588,51.
Antes ne’e, Diretór Ezekutivu SERVE, I.P, Florêncio Sanches, hateten, orsamentu ne’ebé aloka ba bens no servisu hamutuk $2.537.259, saláriu vensimentu laiha, kapitál menór laiha, kapitál dezenvolvimentu laiha no transferénsia públika mós laiha.
“Tinan ne’e ita husu orsamentu ba renovasaun estabelesimentu sukursál SERVE, I.P nian iha munisípiu hotu, entaun hetan osan hamutuk $100.000 iha tinan ne’e, nune’e kada munisípiu hetan $10.000 atu hadi’a edifísiu sira hanesan ezemplu bainhira janela ruma a’at karik bele hadi’a,” Diretór Ezekutivu dehan.
SERVE iha programa rua hanesan boa-governasaun no jestaun instituisionál ho investimentu no diversifikasaun ekonomia, sub-programa rua no atividade rua.
Jornalista : Arminda Fonseca
Editora : Julia Chatarina
