DILI, 27 dezembru 2022 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) planeia ona atu harii edifísiu andar ualu, iha tinan 2025.
“Hahú janeiru 2023, ha’u sei halo fali aprosimasaun ho Governu liuhosi Ministériu Finansa no Minsitériu Obra Públika inklui Banku Dezenvolvimentu Aziátiku (ADB, sigla inglés) atu estende fali durante tinan-rua, iha tinan 2023 to’o 2024 hodi halo estudu, nune’e tinan 2025 ita bele halo ona konstrusaun edifísiu SERVE, I.P ho andar ualu,” Diretór Ezekutivu SERVE, I.P, Florêncio Sanches, hateten ba Agência Tatoli, via telefónika, tersa ne’e.
Edifísiu ne’e nia prosesu loloos atu halo konstrusaun iha tinan 2023, tanba orsamentu antes ne’e aprova ona maibé tanba ADB apoiu hosi parte tékniku, nune’e durante tinan-rua ba kotuk ho situasaun COVID-19 ekipa téknika labele halo viajen mai Timor-Leste.
Notísia relevante: SERVE, I.P rejista empreza 41.000 durante fulan-haat
Orsamentu ne’ebé antes ne’e aprova ba konstrusaun edifísiu mai hosi fundu infreastrutura hamutuk millaun $8 hodi halo dezeñu edifísiu, teste ba rai, estudu, sistema dijitalizasaun rejistu komersiál no fatin konstrusaun edifísiu iha Obrigado Barack, Caicoli, Dili.
“Ita halo andar ualu ne’e tanba la’ós SERVE, I.P de’it mak atu uza, maibé sei iha mós ministériu relevante sira ne’ebé durante ne’e emite sira-nia lisensiamentu mak hanesan Ministériu Turizmu Komérsiu no Indústria, Ministériu Finansa, Ministériu Justisa, Ministériu Transporte no Komunikasaun, no Ministériu Saúde, ho objetivu edifísiu ne’e iha ona ita-nia emprezáriu sira, tanba ne’e bainhira atu trata dokumentu ba atividade komérsiu la pesiza ba fatin ketak-ketak maibé hamutuk de’it,” nia dehan.
Jornalista : Arminda Fonseca
Editora : Julia Chatarina
