DILI, 19 dezembru 2022 (TATOLI)—Servisu Rejistrasaun no Verifikasaun Emprezariál, Institutu Públiku (SERVE, I.P) liuhosi programa rejistu movel durante fulan-haat konsege rejista empreza hamutuk 41.000.
“Ita-nia programa rejistu movel ne’ebé ita lansa iha loron 21 agostu to’o novembru tinan ne’e konsege rejista ona empreza hamutuk 41.000,” Diretór Ezekutivu SERVE, I.P, Florêncio Sanches, hateten ba Agência Tatoli iha ninia knaar fatin, Hudi-laran, segunda ne’e.
Inisiativa implementa programa ne’e tanba maioria komunidade hela iha área rurál no bainhira atu mai vila tenke la’o kilómetru 20 to’o 45.
“Objetivu SERVE, I.P hala’o programa ne’e tanba bainhira negosiante ida hala’o atividade negósiu no la rejista maka bele hetan multa tanba viola dekretu-lei SERVE, I.P ne’ebé deteta halo verifikasaun ba atividade fíziku no arkivu elektróniku, entidade sira viola lei númeru 10/2017 kona-ba sosiedade komunikasaun, dekretu-lei númeru 16/2017 kona-ba rejistu komersiál no dekretu-lei 34/2017 kona-ba lisensiamentu atividade ekonómika,” nia akresenta.
Notísia relevante: OJE 2023 SERVE.I.P prevee milliaun $2-resin
Servisu rejistrasaun movel ne’e gratuita maibé hetan reseita $5.000 liuhosi halo alterasaun no renovasaun.
Tuir Diretór Ezekutivu, durante implementa programa ne’e iha munisípiu sira, hasoru dezafiu boot hodi halo labele atinje númeru másimu, hanesan empreza sira barak mak laiha Billete Identidade (BI) no notariadu menus iha munisípiu tolu hanesan Baucau, Bobonaro no Rejiaun Administrativa Espesiál Oé-cusse Ambeno (RAEOA).
“Ida-ne’e difikulta tebes dezenvolvimentu emprezariál iha territóriu tomak. Difikuldade sira ne’ebé maluk emprezariál sira hasoru hanesan la hetan BI. Espera tinan oin Ministériu Justisa bele rezolve tanba lei sosiedade komersiál fó dalan ba sidadaun sé de’it bele ezerse atividade komersiál maibé ida-ne’e presiza BI,” nia tenik.
Aleinde ne’e, servisu movel ne’e hetan apresiasaun másimu hosi setór privadu sira tanba envolve mós Asosiasaun Feto Emprezariál Timor-Leste (ATMTL).
Jornalista : Arminda Fonseca
Editora : Julia Chatarina
