DILI, 29 dezembru 2022 (TATOLI)—Santa Sé, kuarta (28 dezembro 2022) ne’e, informa agora daudaun Papa Bento XVI nia kondisaun saúde grave.
Liuhosi fonte ofisíal Vatcan News haktuir, iha Audiênsia Jeral ikus, Papa Francisco husu sarani katólika halo orasaun espesiál ba Papa Bento XVI, ne’ebé oras ne’e moras grave liu.
Hafoin Audiênsia Jeral ne’e, Papa Francisco konvida sarani Katólika atu hato’o orasaun espesiál ida ba Papa ne’ebé ho idade 95, Papa Bento XVI.
“Ha’u hakarak hudu ita hotu hasa’e orasaun espesiál ba Papa Bento XVI, ne’ebé sustenta ona Igreja. Hanoin hikas fali moras grave ne’e husu ba Maromak hodi konsola nia no apoiu nia testemuña domin ba Igreja to’o rohan,” Papa Francisco apela.
Diretór Sala de Imprensa da Santa Sé, Matteo Bruni informa katak kondisaun saúde ikus ne’e kontinua grave tanba idade aumenta maibé ninia situasaun nafatin estável no hetan monitorizasaun hosi médiku sira.
Matteo Bruni mós hatete hafoin Audiênsia Jeral iha Sala Paulo VI, Papa Francisco ba kedas kongregasaun Mater Ecclesiae iha Vatikanu, iha-ne’ebé Papa Bento XVI hela bá.
“Ami hamutuk ho nia (Papa Francisco) iha orasaun ba Papa Bento XVI,” nia dehan.
Papa Bento XVI mak naran Papa nian maibé naran loloos ne’e Joseph Alois Ratzinger no moris iha 16 abril 1927.
Nia sai hanesan servidór ba 265 hanesan Papa ba Igreja Katólika Romana iha 19 abril 2005 to’o hato’o nia rezignasaun iha 28 fevereiru 2013.
Jornalsita : Cidalia Fátima
Editór : Cancio Ximenes
