APORTIL rekolla reseita $790.430 hosi ró-ahi Berlin-Ramelau
DILI, 30 dezembru 2022 (TATOLI)–Autoridade Portuáriu Timor-Leste (APORTIL) rekolla reseita $790.430 hosi movimentu ró-ahi Berlin-Ramelau (Dili – Oé-cusse bá mai), durante fulan-ualu iha tinan 2022.
“Tinan oin hakarak hasa’e tasa boot liután tinan ne’e. Atu hasa’e tasa reseita depende hotu ba klima, kuandu anin boot no udan mak sei sei limita tula pasajeiru,” Prezidente Konsellu Administrasaun APORTIL, Lamartino de Oliveira, hateten ba Agência Tatoli, iha ninia knaar fatin, Portu Dili, Colmera, sesta ne’e.
Nia garante, reseita hosi ró-ahi sei sa’e iha tinan oin tanba sei tula pasajeiru barak no veíkulu hamutuk 24 hosi kada rota.
Notísia relevante: MTK kompromete ró-ahi Berlin-Ramelau sei la hasoru ona difikuldade
Tuir dadus ne’ebé Agência Tatoli asesu, ró-ahi Berlin-Ramelau la halo operasaun iha janeiru, maiu no setembru, enkuantu iha dezembru seidauk rekapitula iha baze dadus.
Aleinde reseita hosi ró-ahi Berlin-Ramelau, APORTIL rekolla mós hosi ró Besi $2.936.101,50 no ró Ai’i $793,20, enkuantu reseita hosi armazen deskobertu $296.166,32, no armazen kobertu $11.139,20.
APORTIL rekolla reseita $4.049.257,18 hosi janeiru to’o novembru 2022, ne’ebé akomula ona hosi reseita sira hosi ró tolu no atividade portuáriu durante ne’e.
Jornalista : Antónia Gusmão
Editora : Julia Chatarina
