JUSTISA, BOBONARO, MUNISÍPIU

PNTL sei hein Cristiano rekopera hafoin loke investigasaun profunda

PNTL sei hein Cristiano rekopera hafoin loke investigasaun profunda

Pesoál saúde sira halo hela tratamentu ba Cristiano Emanuél da Costa iha ospitál referál Maliana. Imagen Tatoli/Sérgio da Cruz

BOBONARO, 30 dezembru 2022 (TATOLI)-Polísia Nasionál Timor-Leste (PNTL), Komandu Munisípiu Bobonaro sei hein Cristiano Emanuel rekopera saúde hafoin loke investigasaun ba membru polísia sira ne’ebé Cristiano haktuir katak halo agresaun fizika hasoru nia ho ninian kolega sira seluk iha bairru pemancar, Suku Lahomea, kuarta (27/12), maizumenus tuku 19:00.

Komandante Polísia Munisípiu Bobonaro, Superintendente Antoninho Mauluta, haktuir hafoin médiku sira deside transporta Cristiano halo tratamentu iha Hospitál Nasionál Guido Valadares (HNGV) Dili, iha dader ne’e kedas, sasin hosi labarik sira ne’ebé halimar ‘fugete’ mós mai presta ona deklarasaun iha komandu.

Kona-bá informasaun, dehan Cristiano halai maka monu, oin baku fatuk, Mauluta orienta ona parte investigasaun komandu Munisípiu Bobonaro tún direta ba lokalidade krime nian hodi observa fatin akontesimentu atu bele rekolla dadus ruma.

Notisia relevante: Família Cristiano keixa ona membru polísia nain tolu ba PDHJ

“Antes sira presta deklarasaun, ita fó hatene ba sira katak imi nia prezensa iha ne’e, imi ko’alia livre saida mak imi atu ko’alia, saida mak imi hatene, hareee rasik ho matan, imi bele ko’alia, ne’ebé oras ne’e ita hein de’it alin oan ne’ebé oras ne’e daudaun iha Dili, depois nia kondisaun di’ak, nia sei mai fó nia deklarasaun mak ita foin hareee prosesu seluk, prosesu sira liga ba atuasaun ne’e, liga ba situasaun seluk hodi hala’o prosesu kontinuasaun”, Mauluta informa ba jornalista sira, iha nia kna’ar fatin, sesta ne’e.

Mauluta hateten seidauk bele ko’alia konaba membru sira ne’ebé família Cristiano kondena. “Ita hein de’it depois nia mai, nia rasik mak tenke identifika, nia rasik mak tenke hateten dehan ida ne’e loos duni, maibé tui relatóriu inisíal, momentu ne’ebá sira fahe ekipa hira kedas, balu sae hosi eskola oin, balu sae hosi eskola kotuk, depois balu hosi leten tan”, haktuir.

Komandante ne’e apronfunda katak bainhira prosesu investigasaun la’o mak membru sira halo duni agresaun fízika, komandu sei foti medida ho prosesu legál iha oin rua.

“Ida prosesu kriminál nian mós la’o, prosesu disiplinár mós la’o maibé antes prosesu disiplinár atu la’o, ita hareee hosi krime ne’e, depois ita prosesa to’o iha Ministériu Públiku, ita haree nia desizaun finál katak ne’e ona, prosesu disiplinár mós la’o tanba ne’e lei, ita hotuhotu iha lei nia okos”, revela.

Maibé komandante ne’e esklarese, tuir relatóriu inisiál ne’ebé nia simu hosi polísia hafoin atuasaun ba labarik sira ne’e tanba simu informasaun hosi amu Paroku Santa Cruz Maliana, katak labarik sira ne’e tiru ‘fugetes’ kria barullu besik igreja fó impaktu  ba madre sira bainhira deskansa.

“Madre sira dehan katak tiru ne’e ami iha uma laran mós hanesan uma ne’e nakdoko hotu kedas, ne’e mak kontaktu mai ita nia polísia sira ba atua hodi halo prevensaun, ida ne’e mak momentu ne’ebá mosu situasaun ida alin ne’ebé akontese ho kondisaun oras ne’e iha ospitál”, friza.

Entertantu,  Cristiano Emanuel daudaun ne’e hala’o hela tratamentu intensivu iha HNGV Bidau, Dili.

Jornalista: Sérgio da Cruz

Editór: Zezito Silva

iklan
iklan

Leave a Reply

iklan
error: Content is protected !!