Inundasaun iha Bobokase, Autoridade RAEOA sei hadi’a barajen Tono
OÉ-CUSSE, 31 dezembru 2022 (TATOLI)–Diretór Dirasaun Rejionál Infraestrutura RAEOA, Candido dos Reis Amaral, hateten Dirasaun Rejionál Infraestrutura informa ona ba Prezidente Autoridade kona-ba problema inundasaun ne’ebé akontese iha sesta (30 dezembru) iha bairru Nusla’o, suku Bonokase, sub-rejiaun Pante Makasar.
Notísia Relevante: Komunidade Bobokase husu autoridade RAEOA buka solusaun ba inundasaun
Nia hateten, inundasaun ne’e konsidera hanesan dezastre naturál maibé saida mak Autoridade tenke halo mak sei halo rehabilitasaun no identifika vítima sira, posibilidade sei fó solusaun hodi kanaliza tuir nia dalan ba iha fatin loloos no sei hadi’a gabiaun no barajen Tono.
“Inundasaun akontese iha Nusla’o, ha’u rasik halo ona relatóriu ba Prezidente Autoridade. Sá solusaun mak ita atu halo, hodi proteje komunidade sira iha fatin ne’e entaun iha futuru ita tenke hadi’a barajen Tono no mós gabiaun. Maibé ne’e la garante katak bee sei latama ba komunidade, entaun saida mak ita halo, ne’e ita atu desvia de’it dirasaun bee ne’e ba fatin loloos,” Candido dos Reis Amaral informa ba Agência Tatoli iha Oé-Cusse, sábadu ne’e.
Nia hateten, ida-ne’e la’ós kauza hosi barajen Tono maibé ein-prinsipíu bee-mota ne’e sempre suli hosi fatin aas ba fatin ne’ebé kle’an no tetuk liu tanba bee ne’e nunkla suli hosi rai kle’an sa’e be rai aas.
“Entaun, Nusla’o agora daudaun ne’e nia iha okos, bee suli hosi parte Nunuheno ninian, nia inklinasaun ne’e makaas, ne’e kauza akontese kada tinan tanba inan-aman sira laiha konxiénsia tanba lere toos lahó dixipliña hodi estraga ambiente. Entaun, depozita rai-henek makaas, Dirasaun Infraestrutura iha responsabilidade tékniku atu rezolve problema ne’ebé komunidade bairruo Nusla’o enfrenta,” nia dehan.
Tuir nia, hafoin akontese inundasaun hamosu diskusaun barak maibé ne’e kauza tanba dezastre naturál, maibé autoridade imposivél tur haree de’it.
Tan ne’e, iha loron ne’e Dirasaun Rejionál Infraestrura liuhosi Unidade Jestaun Ekipamentu (IJE) destaka kedan ekipamentu iha fatin akontesimentu, atu haree posibilidade saida de’it mak ho temporariamente maibé planu longu prazu tenke halo estudu di’akliu oinsa ita desvia bee ne’e tuir fatin loloos.
Entretantu, tuir dadús provizóriu ne’ebé Agência Tatoli asesu liuhosi Gabinete Prezidente Autoridade RAEOA hatudu katak uma kain 33 mak sai vítima afetadu inundasaun iha Oé-Cusse ne’ebé akontese ihasesta (30 dezembru 2022) ne’e.
Hosi dadús ne’e, uma kain 11 iha bairru Nusla’o, aldeia Bihala, aldeia Oé-Baha suku Bobometo uma kain ualu (8), suku Costa iha bairru Samoro ne’e iha uma kain rua (2), Nunuheno suku Cunha iha uma kain 10, bairru Mahata suku Costa uma kain ida (1) no suku Naimeko iha bairru Kuafeu iha uma-kain ida (1).
Jornalista : Abílio Elo Nini
Editór : Cancio Ximenes
