DILI, 02 janeiru 2023 (TATOLI)—Prezidente Repúblika (PR), José Ramos Horta, domingu (01/01/2023) ne’e, partisipa serimónia fó pose ba Prezidente Repúblika, Federativa Brazíl, Luis Inacio Lula da Silva no vise Prezidente Geraldo José Rodrigues Alckmin Filho iha Palásiu Itamaraty Brasilia.
Notísia Relevante: PR ko’alia projetu kooperasaun área oin-oin ho konselleiru Prezidente Brazíl eleitu
Durante serimónia pose, Prezidente Brazíl, Luís Inácio Lula da Silva promete atu ukun populasaun millaun 200-resin, rivalidade polítika no hakotu divizaun, intoleránsia, pobreza no hamlaha iha Brazíl.
Lula deskreve nia mandatu hanesan primaveira (estasaun tempu ba ai-funan), hodi hakesi fali amizade entre brazileiru sira hodi la husik ema ida iha kotuk.
“Ita nasaun ida de’it, povu ida de’it, nasaun boot ida, ita hotu brasileiru, brasileira, kompartilla virtude ida. Ita nunka deziste, ita fokit ai-fuan hotu, ida-idak, pétala ida-idak, ita hatene sempre tempu atu kuda hikas, tanba primaveira sei to’o no primaveira to’o duni ona,” Prezidente Lula hato’o liuhosi komunikadu imprensa ne’ebé Ajénsia TATOLI hosi mídia Palásiu Prezidensiál, segunda ne’e.
Prezidente Brazíl rekoñese Brazíl rejista dezigualade barak, tanba ne’e nia serbisu ho nia Vise Prezidente, Geraldo José Rodrigues Alckmin Filho, atu kombate dezigualdade entre povu brasileiru.
“Tanba ne’e ha’u ho nia kompaneiru Geraldo José Rodrigues Alckmin Filho, assume ohin, iha ita-boot sira no povu brazileiru nia oin, atu kombate kalan no loron, dezigualdade iha ita-nia rain, dezigualdade renda, dezigualdade jeneru no rasa, dezigualdade iha merkadu traballu, iha reprezentasaun polítika, karreira iha Estadu, dezigualdade ba asesu saúde, edukasaun no serbisu públiku hotu,” Lula da Silva hateten.
Hafoin simu pose, Prezidente Repúblika, José Ramos Horta, hanesan ema datoluk ne’ebé kongratula Prezidente Brazíl, hafoin Xefe Estadu Portugál, Marcelo Rebelo de Sousa no Xefe Estadu, Argentina Alberto Fernández.
Serimónia tomada de pose ne’e partisipa mós Xefe Estadu Alemaña, Angola, Argentina, Bolivia, Cabo Verde, Guiana, Guiné Bissau, Paraguai, Portugál, Suriname, Uruguiai, Zimbábue, liurai España no Prezidente Parlamentu Argélia.
Antes serimónia, Kongressu Nasionál Brazíl organiza sesaun solene ida, hodi promulga emenda konstitusionál, data nasionál sira, omenajea bá Xefe Estadu ne’ebé marka prezensa no mós omenajea Eis Jogadór Edson Arantes do Nascimento–Pelé no Papa Emeritu Bento XVI ne’ebé mate antes loron toma pose Prezidente Brazíl.
Jornalista : Nelson de Sousa
Editór : Cancio Ximenes
