DILI, 03 janeiru 2023 (TATOLI)– Ministériu Edukasaun Juventude no Desportu (MEJD) prepara ona atu halo inaugurasaun infraestrutura eskola hamutuk 87 hosi projetu komunitáriu 79, kategoria kapitál dezenvolvimentu neen no bens no servisu ida, ba faze dahuluk iha janeiru 2023.
“Ministériu prepara ona programa lansamentu dahuluk inaugurasaun projetu komunitáriu 87 ne’ebé mak la konsege realiza iha tinan 2022 no agora sei hetan inaugurasaun hosi Primeiru-Ministru, Taur Mata Ruak, iha janeiru nia laran maski seidauk determina data. Momentu ne’ebá Primeiru-Ministru halo hela lisensa, tanba ne’e maka ita la konsege realiza inaugurasaun,” Diretór Nasionál Dezenvolvimentu Parke Eskolár hosi MEJD, Agostinho Soares, informa ba Agência Tatoli, iha ninia knaar fatin, MEJD Vila Verde, tersa ne’e.
Notísia relevante: Proposta pagamentu empreza responsável projetu komunitáriu to’o de’it novembru
Diretór ne’e haktuir, durante semana rua responsável projetu sira la konsege kontinua projetu seluk, nune’e eskola 87 mak konsege ramata ona projetu.
“Iha semana ida-ne’e nia laran ita seidauk simu tan relatóriu kona-ba atu aumenta númeru projetu 87, ne’e fiksu ona iha munisípiu sira ita hein de’it atu halo lansamentu,” nia akresenta.
Bazeia ba orientasaun Ministériu Edukasaun Juventude no Desportu, Armindo Maia, katak infraestrutura eskola tenke lansa hosi Primeiru-Ministru, tanba ne’e Diresaun Nasionál Dezenvolvimentu Parke Eskolár (DNDPE) deside planu inaugurasaun iha inísiu tinan ne’e.
Serimónia lansamentu faze dahuluk sei realiza iha munisípiu Baucau, ne’ebé Primeiru-Ministru rasik sei lansa simbólikamente iha Eskola Ensinu Báziku Filiál (EBF) Mau-Kale, Gariuai depois membru Governu sira sei simu orientasaun atu reprezenta Governu halo inaugurasaun eskola iha kada munisípiu.
Jornalista : Tomé Amado
Editora : Julia Chatarina
