Top

PN hato’o sentidu kondolénsia ba falesimentu Papa Bento XVI

Papa Emeritu Bento XVI nia mate-isin hatu’ur iha kapela kongeragasaun mater Ecclesiae nia laran iha Vatikanu. Imajen/Espesiál.

DILI, 03 janeiru 2023 (TATOLI)—Vise Prezidente Parlamentu Nasionál, Maria Angelina Sarmento, lori Parlamentu Nasionál (PN) nia naran hato’o sentidu kondolénsia ba Papa Emeritu Bento XVI ne’ebé mate iha Vátikanu ho idade 95.

Notísia Relevante: Dom Virgilio Kardeál hato’o sentidu kondolénsia ba Papa Bento XVI nia mate

“Ha’u ho ha’u-nia família nu’udar ema kristaun katólika no hau nu’udar mós reprezentante povu  ne’ebé maiória ema katólika hakarak hato’o profunda sentidu kondolénsia  ba  ierárkia igreja katólika iha Vátikanu-Roma, tanba iha semana ida-ne’e lakon ona Nai nia bibi atan di’ak ida Papa Emeritu Bento XVI ne’ebé husik ona mundu ne’e,” Vise Prezidente PN ne’e hateten ba jornalista sira, tersa ne’e.

Nune’e, sarani katólika tomak tenke simu realidade ida-ne’e hodi hamutuk hasa’e orasaun ba Bento XVI nia klamar atu hetan fatin hakmatek iha Nai nia kadunan santa.

“Hakmatek ba iha Nai nia reinu lalehan hamutuk ho anju no santu sira hodi hananu aleluia, amen,” nia dehan.

Vise Parlamentu Nasionál (PN) ne’e  lembra iha fulan-agostu 2022 bainhira Santu Padre  Francisco atu halo tomada posse durante konsistóriu iha Roma.

“Antes hahú serimónia Papa Francisco ba vizita uluk Bento XVI hodi aprezenta ba nia kona-ba  serimónia  konsistóriu  Kardeál sira-nian, tanba Papa Bentu XVI moras hela labele la’o hodi partisipa mós iha serimónia refere,” nia dehan.

Hatán kona-ba karik PN sei hato’o mós votu pezár ba falesimentu Papa Bento XVI, Vise PN, Maria Angelina Sarmento, hateten nia-parte seidauk hatene tanba Deputadu sira sei tama fali serbisu iha loron 05 fulan-janeiru ne’e.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!