APORTIL presiza tau atensaun alerta hosi dirasaun meterolojia

DILI, 04 janeiru 2022 (TATOLI)—Vise Prezidente Komisaun E trata asuntu Infraestrutura iha Parlamentu Nasionál (PN), Fabião Oliveira, husu Autoridade Portuáriu Timor-Leste (APORTIL) presiza tau atensaun alerta hosi Dirasaun Meterolojia, relasiona ho insidente ró-ahi Berlin Nakroma kose malu ho Berlin Ramelau iha tasi laran Portu Dili.
Notísia Relevante: Ró-ahi Berlin Nakroma hahú hikas viajen bá Oé-cusse Hafoin hasoru insidente
“Ha’u hakarak ko’alia transporte marítima, avizu ne’ebé metrolojia fó sai ona ita haree ró sira Berlin Nakroma ho Berlim Ramelau tenke alerta. Se kuandu dehan labele sai entaun labele,” Vise Prezidente Komisaun E ne’e hateten ba Agência TATOLI, kuarta ne’e.
Berlin Nakroma tuir oráriu iha tersa (03/01) halo viajen ba Rejiaun Administrativa Espesiál Oé-Cusse Ambeno (RAEOA) maibé tanba laloran boot halo ró ne’e kose-malu ho Berlin Ramelau, iha tasi laran Portu Dili nian.
“Labele akontese hanesan horisehik ró kose malu fali iha ne’ebá, Nakroma kose fali Berlin Ramelau tanba problema anin boot natureza ne’e ita tahan labele,” nia hateten.
Nune’e, Deputadu Fabião husu Autoridade Portuáriu Timor-Leste (APORTIL) presiza haree kestaun refere.
“APORTIL presiza haree ida-ne’e labele difikulta fali ita-nia pasajeiru sira, lae ita-nia pasajeiru sira sa’e tiha depois mak anin boot iha problema,” nia dehan.
Nune’e, nia husu labele faan billete no faan haree no koordena lai ho parte meterolojia hodi hatene previzaun tempu oinsá.
Jornalista : Nelson de Sousa
Editór : Cancio Ximenes

