DILI, 04 janeiru 2023 (TATOLI)—Ró-ahi Berlin Nakroma tuir oráriu iha tersa (03/01) halo viajen bá Rejiaun Administrativa Espesiál Oé-cusse-Ambeno (RAEOA), maibé tanba laloran boot, halo ró ne’e kose-malu ho ró-ahi Berlin-Ramelau, iha tasi Portu Dili.
“Oriseik (tersa) ne’e oráriu Berlin Nakroma ninian, tanba ejizénsia públiku liu-liu pasajeiru sira iha Dili no RAEOA atu garantia arus balik ba sira ne’ebé foin lalais ba feriadu atu fila mai Dili, entaun ami halo koordenasaun ho autoridade reguladora hanesan Diresaun Nasionál Transporte Marrítima no Diresaun Meterolojia molok ami fa’an billete ba pasajeiru 100-resin hodi viajen ba RAEOA. Momentu ró sai ne’e maka laloran boot akompaña ho korrente, entaun ró sai ba anin dudu nia mai kose duni iha ró Ramelau,” Diretór Kabutajen Nasionál hosi Autoridade Portuáriu Timor-Leste (APORTIL), Feliciano da Costa Coreia, informa ba jornalista sira, iha edifísiu APORTIL, Portu Dili, Colmera, kuarta ne’e.
Notísia relevante: Ró-ahi Berlin Nakroma to’o hikas Dili hafoin manutensaun iha Surabaya
Nia dehan, maski kose kona ró-ahi Berlin-Ramelau maibé kondisaun ró Berlin Nakroma di’ak hela tanba kona iha tali-fatin, ne’ebé hetan ajuda hosi ró sira seluk nune’e atraka fali iha Portu Dili ho kondisaun di’ak.
“Tanba haree ba kondisaun seguransa, entaun iha tersa ne’e ami deside la halo viajen, maibé molok pasajeiru sira filafali bá uma, ami aviza ba sira tanba ne’e iha kuarta (04/01), tuku 08:00 dadeersan sira sai hosi Dili bá Oé-cusse,” nia akresenta.
Aleinde ne’e, hafoin ró-ahi Berlin Nakroma ne’e atraka, téknikamente koordena ho kapitaun ró hodi haree mákina ró no konfirmadu katak buat hotu di’ak.
Oráriu viajen kada semana ba ró-ahi Berlin-Ramelau iha segunda no kuarta bá RAEOA, enkuantu Berlin Nakroma iha tersa de’it mak halo viajen bá RAEOA, enkuantu kinta no sábadu bá Ataúro.
Jornalista : Antónia Gusmão
Editora : Julia Chatarina
