DILI, 04 janeiru 2023 (TATOLI)—Autoridade Portuáriu Timor-Leste (APORTIL) durante ne’e halo atendimentu fa’an billete ró-ahi Berlin-Ramelau no Berlin Nakroma ba pasajeiru ho manuál ka fahe ho liman de’it iha Portu Dili, nune’e dalaruma mosu dezentendimentu.
“Desde uluk to’o agora ami-nia atendimentu fa’an billete sei manuál hela, sistema atendimentu dala barak mosu dezintendimentu hanesan iha loron-boot ema barak no sena malu, entaun dala-ruma ami atende ladún di’ak tanba ema barak,” Diretór Kabutajen Nasionál APORTIL, Feliciano da Costa Coreia, informa iha ninia knaar fatin, Portu Dili, Colmera, kuarta ne’e.
Maski nune’e, APORTIL liuhosi Diresaun Kabutajen Nasionál halo esforsu hodi fó atendimentu di’ak ba públiku.
“Tanba foin hahú fali servisu, ami tarde halo atendimentu hanesan fa’an billete, ne’ebé hodi naran Kabutajen Nasionál husu deskulpa ba pasajeiru sira tanba ladún atende ho di’ak,” nia akresenta.
Notísia relevante: Ró-ahi Berlin Nakroma hahú hikas viajen bá Oé-cusse Hafoin hasoru insidente
Aleinde ne’e, APORTIL tau ona iha planu atu hadi’a espasu ba pasajeiru hanesan halo terminál doméstika, relasiona ho preokupasaun públiku kona-ba espasu ba pasajeiru iha bee-nalihun halo pasajeiru sira sente la konfortável.
“Espera tinan 2023 ne’e bele realiza konstrusaun terminál pasajeiru,” nia tenik.
Billete ba pasajeiru ba ró-ahi Berlin-Ramelau no Berlin Nakroma ho folin $8 ba kada ema, motorizada $15 bá Oé-cusse no $10 bá Ataúro, enkuantu billete ba karreta kiik $115 bá Oé-cusse no $50 bá Ataúro.
“Presu ne’e ami seidauk halo mudansa, nafatin hanesan antes. Karik iha mudansa ruma tenke iha koñesimentu hosi superiór,” nia tenik.
Daudaun ne’e ró-ahi ne’ebé prepara hosi Governu mak Berlin-Ramelau no Berlin Nakroma, enkuantu hosi empreza mak ró-ahi Success ho rota viajen Dili – Oé-cusse no Dili – Ataúro.
Jornalista : Antónia Gusmão
Editora : Julia Chatarina
