DILI, 04 janeiru 2023 (TATOLI)–Konstrusaun fíziku Eskola Ensinu Báziku Filiál (EBF) Manetu iha munisípiu Ainaro liuhosi programa projetu komunitáriu hosi Ministériu Edukasaun Juventude no Desportu (MEJD) foin atinje 25%.
Diretór Servisu Edukasaun Munisípiu Ainaro (DSEMA), Oscar de Araújo, relata, eskola 16 iha munisípiu Ainaro mak sei benefisia programa projetu komunitáriu, maibé progresu konstrusaun Eskola EBF Manetu mak atraza liu.
“Eskola EBF Manetu atraza tanba akontese mudansa klimátika iha tinan kotuk, tanba ne’e afeta ba ninia progresu fíziku sira. Maibé ho esforsu hotu agora besik tama ona ba faze daruak,” Diretór informa ba Agência Tatoli via telefónika, kuarta ne’e.
Notísia relevante: Implementasaun projetu komunitáriu 11 iha Liquiçá hasoru difikuldade
Aleinde ne’e, iha projetu komunitáriu 15 mak nia progresu fíziku atinje ona 70% no hein de’it atu halo ona levantamentu dadus hodi tama ba pagamentu faze datoluk.
“Ami kontinua halo monitorizasaun ba servisu ne’ebé maka enjeñeiru no supervizór sira halo daudaun ne’e, kuaze esforsu nafatin atu Eskola EBF ne’e bele ultrapasa progresu fíziku atu nune’e ba oin bele halo levantamentu dadus hodi hetan pagamentu iha faze daruak,” nia akresenta.
Hosi eskola 16, Ensinu Sekundáriu Jerál iha ida no restu kuaze Ensinu Báziku Sentrál no Filiál.
“Fiar katak bainhira eskola sira ne’e atinje ona faze daruak, sei aselera liután prosesu reabilitasaun no konstrusaun atubele konklui prosesu sira hodi bele tama ba lansamentu infraestrutura,” nia tenik.
Jornalista : Tomé Amado
Editora : Julia Chatarina
