DILI, 04 janeiru 2022 (TATOLI)—Vise Prezidente Komisaun E trata asuntu Infraestrutura iha Parlamentu Nasionál (PN), Fabião Oliveira, ezije ba Governu liuhosi Ministériu Obra Públika (MOP) atu loke dalan alternativa ba ponte Buanurak ne’ebé kotu, nune’e populasaun sira bele halo movimentu ba-mai.
Notísia Relevante: Ponte Buanurak-Dilór kotu, Deputadu Dario husu Governu loke dalan alternativa
“Kestaun ne’e Deputadu hosi Viqueque-oan, Dario Madeira, no populasaun sira iha ne’eba levanta beibeik katak tenke iha dalan alternativu atu fasilita ita-nia transporte públiku no komunidade bele lori sira-nia produtu lokál bele halo movimentasaun ba-mai,” Vise Prezidente Komisaun E ne’e hateten ba Agência Tatoli, kuarta ne’e.
Ezijénsia ne’e komunidade, autoridade munisipál no Deputadu sira levanta beibeik, nune’e nesesáriu duni atu tau atensaun tanba konstrusaun ponte Buanurak ne’ebé kotu ne’e presiza tempu.
Ponte Buanurak ne’e sai hanesan baliza entre postu administrativu Ossu ho postu administrativu Viqueque Vila, munisípiu Viqueque.
“Karik bele Institutu Jestaun Ekipamentu, Institutu Públiku (IGE, I.P, sigla portugés) loke ona estrada alternativu bele fasilita ita-nia komunidade sira-ne’e solusaun di’ak,” nia dehan.
Antes ne’e, Deputadu hosi bankada Frente Revolsionária Timor-Leste Independente (Fretilin), Dario Madeira, rekomenda ba Governu atu loke estrada alternativu hosi postu saúde Buanurak nian ba mosu iha Ensinu Sekundáriu 04 setembru Viqueque kuaze kilómetru tolu (3)-resin, tanba ida-ne’e tempu udan mós bele fasilita komunidade tanba la hakur mota.
Notísia Relevante: MOP orienta kompañia halo servisu rua rezolve ponte Buanurak ne’ebé kotu
Jornalista : Nelson de Sousa
Editór : Cancio Ximenes
